ماڭعىستاۋ وبلىسىنىڭ ەكولوگيا دەپارتامەنتى اقتاۋ قالاسىنىڭ ىرگەسىندە جۇك كولىگى مەن مۇناي تاسىمالدايتىن تەپلوۆوزدىڭ سوقتىعىسۋى سالدارىنان ورىن العان الاپات ءورت پەن تابيعاتقا كەلگەن شىعىن كولەمىن انىقتادى، - دەپ حابارلايدى Baq.kz اقپاراتتىق قىزمەتى.ماماندار ەسەبىنشە كەلتىرىلگەن زالال 120 ميلليون تەڭگەنى قۇرايدى ەكەن. ايىپپۇل رەتىندە وندىرىلەتىن بۇل قارجىنى «ەمير ويل» كومپانياسى تولەۋگە مىندەتتى. ەستەرىڭىزگە سالا كەتەيىك، اپاتتى جاعداي 16 قاراشا كۇنى ورىن الىپ، مۇناي توگىلۋى سالدارىنان 3 480 شارشى مەتر جەردى جالىن شارپىعان ەدى. وكىنىشكە قاراي، تەپلوۆوز ءماشينيسىنىڭ كومەكشىسى وقيعا ورنىندا قازا تاۋىپ، ماشينيست پەن جۇك كولىگىنىڭ جۇرگىزۋشىسى امان قالعان. بۇگىندە اپاتتى جايتقا جۇك كولىگىنىڭ جۇرگىزۋشىسى ايىپتى دەگەن كۇدىكپەن ءىس قوزعالعان. ال امان قالعان تەپلوۆوز ءماشينيستى بەرىك قۇلباراقوۆتىڭ ءوزى اۋرۋحانا توسەگىندە جاتۋىنا بايلانىستى، ونىڭ اكەسىنە تاۋەلسىزدىك كۇنى قارساڭىندا «قازاقستان تەمىر جولى» ۇك» اق پرەزيدەنتى اسقار مامين «قۇرمەتتى تەمىرجولشى» اتاعىن تاپسىرعان بولاتىن.