"الەۋمەتتىك جەلىدە جاريالانعان كەنەسارى حاننىڭ باس سۇيەگى تۋرالى اقپارات عالامتوردى ءدۇر سىلكىندىردى" دەيدى 31 ارنا تىلشىلەرى .

كەنەسارى - اق كيىزگە كوتەرىلگەن قازاقتىڭ ەڭ سوڭعى حانى. تۇركياعا بارعان ساپارىندا نۇرسۇلتان نازاربايەۆ "قازاقتىڭ ەڭ سوڭعى حانى ولتىرىلگەن سوڭ، ەلىمىزدە وتارلاۋ ساياساتى كۇشەيگەنىن" ايتقان ەدى.

سەنساسيالىق سۋرەت الەۋمەتتىك جەلىلەرگە كەشە تاڭەرتەڭ سالىنعان. ءبىراق بۇل سۋرەتتى كىمنىڭ قايدان العانى بەلگىسىز. بەلگىلىسى، باس سۇيەك تەلەفوننىڭ كامەراسىنا تۇسىرىلگەن. جابىق  اينەكتىڭ ىشىندە ساقتاۋلى تۇرعان  قانقانىڭ استىنداعى بەلگى قاعازدا "كەنەسارى حان قاسىموۆ، پوسلەدنيي رازبوينيك كيرگيزكوي ستەپي" دەگەن جازۋ بار.

باس ارنايى تەمىر قوندىرعىعا قويىلعان. الدىڭعى تىستەرى تۇگەل ساۋ.  انىقتاپ قاراساڭىز قاسىندا تاعى ءبىر باس سۇيەكتىڭ شەتى كورىنەدى. ياعني، مۇراجايدىڭ ءىشى بولۋى مۇمكىن. ال، قانقانىڭ جوعارى جاعى تەمىرمەن جيەكتەپ قاپتالعانىنان، باس سۇيەكتى كۇلسالعىش رەتىندە قولدانعان دەپ توپشالاۋعا بولادى.

كەنەسارى ۇرپاقتارىن زەرتتەۋشى عالىم راشيد ورازوۆتىڭ ايتۋىنشا، ورىس پاتشايىمى ەكاتارينا كەنەسارىنىڭ باس سۇيەگىنە التىن قۇيدىرىپ، كۇلسالعىش جاساتقان دەگەن بولجامدار بۇعان دەيىندە ايتىلعان.

ءبىراق،  بابامىزدىڭ باسى مۇراجايدا بۇلايشا اشىقتان-اشىق ساقتالىپ تۇرۋى مۇمكىن ەمەس دەيدى. 

ويتكەنى، 1994 جىلدان بەرى سايلانعان ەكسپەديسيالاردىڭ ەشبىرى ناتيجە بەرمەگەن. كەنەسارىنىڭ باس سۇيەگى بولۋى مۇمكىن مەكەمەلەر مەن مۇراعاتتارعا دەيىن اقتارىپ شىققان ىزدەۋشىلەرىمىزدىڭ بارلىعىنىڭ تاۋى شاعىلعان بولاتىن.

راشيد ورازوۆتىڭ ايتۋىنشا، جاقىندا پرەمەر- مينيستر سەرىك احمەتوۆتە سوڭعى حاننىڭ باسىن قايتارۋدى  شەگەلەپ ايتىپ،  ىزدەستىرۋشىلەرگە  تاعى دا تاپسىرما  بەرىپتى. الايدا، عالىمدارىمىز، حان كەنەنىڭ باسىن قايتارۋدان بۇرىن، ول باس سۇيەكتى ىزدەۋدىڭ ءوزى از عانا ادامداردىڭ قولىنان كەلمەيدى دەيدى. 

سەبەبى، ءبىر عانا ەرميتاجدىڭ وزىندە 3،5 ملن ەكسپونات بار. ال، زەرتتەۋشى عالىم حانكەلدى ءابجانوۆ بولسا، قانشا سايلانىپ شىققان ەكسپەديسيا تابا الماي قويعان بۇل دۇنيەنى راسىمەن تاپقان ادام بولسا، باياعىدا ءسۇيىنشى سۇرار ەدى. بۇل ارانداتۋشىلىق ارەكەت دەپ ەسەپتەيدى.

ەگەر ول تابىلا قالسا، ەگەر ونىڭ ءبارى اقيقات بولسا، ول نەمەنەگە جاسىرىنىپ وتىر بۇرىن جاريالاعان ادام.

"ەگەر ول تابىلا قالسا، ەگەر ونىڭ ءبارى اقيقات بولسا، ول نەمەنەگە جاسىرىنىپ وتىر بۇرىن جاريالاعان ادام. قايتا بۇكىل قازاقتان ءسۇيىنشى سۇراپ، ءوزىنىڭ بەت الپەتىن ايتىپ، اتى ءجونىن ايتىپ، جۇرەر ەدى عوي"، - دەيدى شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى حانكەلدى ءابجانوۆ.

اقىرى، جاريالانعان سۋرەتتىڭ ءتۇپنۇسقاسىن تابۋ ءۇشىن، 31 ارنا تىلشىلەرى الەۋمەتتىك جەلىگە جاريالاعان جىگىتتەرمەن حابارلاستى. ولار بەلگىلى ءبىر اكتريسا جاريالادى دەگەن ءۋاج ايتتى.

"اكتريسا" جاريالاعان فوتو بولعان سوڭ، تىلشىلەر تەزىرەك ول ءتۇسىپ جاتقان ءفيلمنىڭ رەجيسسەرىنە حابارلاستى. ال، تۇبىندە ءبىز ىزدەگەن حان كەنەنىڭ باس سۇيەگى ماسكەۋدەن دە ەمەس، سانكت-پەتەربوردىڭ  ەرميتاجىنان دا ەمەس، اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ مۇراجايىنان تابىلدى. 

عالامتورعا جاريالانعان سەنساسيالىق سۋرەتتىڭ ءتۇپنۇسقاسى الماتىداعى اسفەندياروۆ اتىنداعى مەديسينا ۋنيۆەرسيتەتىنىڭ مۇراجايىنان تابىلعانى ءتىپتى سەنساسيا بولدى. الايدا، بۇل ءبىز ويلاعانداي قازاق دەپ قاسىق قانى تامعانشا قىرقىسقان  كەنەسارى قاسىم ۇلىنىڭ باس سۇيەگى بولماي شىقتى. 

بۇل رەجيسسەر ساتىبالدى نارىمبەتوۆ كەنەسارى تۋرالى "امانات" فيلمىنە ارنايى جاسالعان دەكوراسيا ەكەن. بۇل تۋرالى رەجيسسەردىڭ ءوزى ايتىپ بەردى.