وڭتۇستىك قازاقستان وبلىسى ارىس اۋدانىنا قاراستى مونتايتاس ەلدى مەكەنىندە الدەبىرەۋ جەرگىلىكتى تۇرعىنداردىڭ قىسقا جيناعان مال ازىعىنا قىرعيداي ءتيىپ جاتىر. بۇل تۋرالى «قامشى» پورتالى otyrar.kz سايتىنا سىلتەمە جاساي وتىرىپ حابارلايدى.

جەم-شوپ ساقتايتىن قورا-قوپسىلارى ورتكە ورانىپ، ونىڭ تەك ك ۇلى عانا قالعان. اككى ارەكەتىمەن اۋىلدى اۋرەگە سالعان بۇزاقى ءالى كۇنگە ۇستاتپاي ءجۇر. وعان ءتىپتى، پوليسەيلەردىڭ  دە پارمەنى جەتەر ەمەس، دەيدى اۋىل تۇرعىندارى.

گۇلجاحان قابىلوۆانىڭ قوراسىن ەكى رەت ورتەپ جىبەرگەن. 50 شاقتى بۋماسى مەن 5 كولىككە تيەپ الىپ كەلگەن ءسابان-شوبى كۇلگە اينالدى. اۋلاسىندا ءتىلسىز جاۋ ءالى تۇتەپ جاتىر. الا جازداي ادىردان مالىنا ازىق جيناپ، اۋلاسىنا ءۇيىپ تاستاعان ەڭبەگى ەش كەتكەنىنە كەلىنشەك جىلارمان كۇيدە. بۇل جەرگىلىكتى جۇرتقا ناۋبەت بولدى دەپ شاعىنادى. بۇل تۋرالى اۋەلى today.kz پورتالى حابارلايدى.

ءقازىر اۋىلدا ءورت ءسوندىرۋ قىزمەتى مەن ءتارتىپ ساقشىلارى كەزەكتە قويىلىپتى. كۇن-تۇن دەمەي كۇدىكتىنى قولعا ءتۇسىرۋدىڭ قامىندا. الايدا، ەشقانداي ناتيجە جوق.  جاتىن ورىنداردا ارنايى جاساق پەن پوليسيا وكىلدەرى تۇنەپ تە شىعادى. بىرنەشە كۇش بىرىكتىرىلسە دە، قۇزىرلىلار بۇزاقىنى ءالى كۇنگە قۇرىقتاي الماي وتىر.

قۇزىرلى ورگاندار ءورت وقيعالارىنىڭ كوبىنە تۇنگى مەزگىلدە بولاتىنىن ايتادى. بۇگىنگە دەيىن اۋىلداعى 17 قورا قىزىل جالىنعا ورانىپ ۇلگەرىپتى. ال ءتارتىپ ساقشىلارى ايعاقتى زاتتى ساراپتاماعا جىبەرۋدەن وزگە تىندىرعان ءىسى جوق.