«قازاق حاندىعىنىڭ 550 جىلدىعى» اياسىندا قازاقتىڭ داڭقتى قولباسشىلارىنىڭ ءبىرى، 12 رۋلى كەرەيدىڭ شەرۋشى رۋىنىڭ ۇرانى بولعان بايتايلاق باتىردى ەسكە الۋعا ارنالعان كولەمدى شارا وتپەك. 

27 قىركۇيەكتە شىعىس قازاقستان وبىلىسى جارما اۋدانى قالبا تاۋى باۋرايىندا باتىردىڭ كەسەنەسى ورناتىلىپ، اس بەرىلىپ، قۇران وقىتىلادى. 29 قىركۇيەك كۇنى استانادا بايتايلاق باتىرعا ارنالعان عىلىمي-پراكتيكالىق كونفەرەنسيا وتەدى جانە شەتەلدەن كەلگەن قازاق ونەرپازدارىنىڭ قاتىسۋىمەن كولەمدى كونسەرت وتەدى دەپ جوسپارلانۋدا.

سونداي-اق، وسىنداي شارالار الماتى قالاسىندا دا جالعاسىن تاباتىن بولادى. قىتايدا تۇراتىن بەلگىلى عالىم، قوعام قايراتكەرى قادىس ءجانابىل ۇلىنىڭ باستاماسىمەن وتكەلى وتىرعان ەسكە الۋ شارالارى قىتايدان جانە موڭعوليادان كەلگەن بەلسەندى قازاق ازاماتتارىنىڭ كۇشىمەن اتقارىلماق.

«باتىر بابامىز بايتايلاق قازاق حالقىنىڭ جوڭعار شاپقىنشىلىعىنا قارسى ۇلت ازاتتىق كۇرەستە ەرەكشە ەرلىك كورسەتىپ، اتى اڭىزعا اينالعان ەسىمى تۇتاس ءبىر رۋلى ەلدىڭ ۇرانى بولعان ايتۋلى تۇلعا. شەرۋشى رۋى نەگىزىنەن جۇڭگو مەن موڭعوليا جەرىن مەكەندەپ قالعاندىقتان بايتايلاق باتىر تۋرالى تاريحي مالىمەتتەر قازاقستاندا كوپ تارالماعان. ادەتتە ونىڭ ەرلىگى قابانباي، بوگەنباي، جانىبەك، ناۋرىزباي سەكىلدى باتىرلارمەن بىرگە اتالادى. بابامىزدىڭ ەرلىگىن ق ر ءبىلىم جانە عىلىم مينيسترلىگى عىلىم كوميتەتىنە قاراستى ش.ءۋاليحانوۆ اتىنداعى تاريح جانە ەتنولوگيا ينستيتۋتى رەسمي تانىپ وتىر. ەر جانىبەك ومىردەن وتەر شاعىندا ءوزىن اعاسىنىڭ قاسىنا جەرلەۋدى امانات ەتكەن ەكەن. بايتايلاق پەن ەر جانىبەك اعالى-باۋىرلى عانا ەمەس، تۇلپار ءمىنىپ، تۋ ۇستاعان ۇزەڭگىلەس باتىر، ەلى، جەرى ءۇشىن قان مايداندا ەرلىگىمەن تانىلعان دارا تۇلعالار بولعان. بۇگىندە قالبا تاۋىنىڭ باۋرايىندا بايتايلاق قورىمى دەپ اتالاتىن جەر اتاۋى دا ساقتالعان. سول ءۇشىن دە قازاق حاندىعىنىڭ 550 جىلدىعى قارساڭىندا باتىر بابامىزدى ۇلىقتاۋ ماقساتىندا ناقتى شارالار وتكىزۋ جوسپارلاپ وتىرمىز. جەكەلەگەن بەلسەندى ازاماتتاردىڭ ۇيىمداستىرۋمەن وتەتىن ەسكە الۋ شارالارىنىڭ ناقتى باعدارلاماسى نەگىزىنەن دايىن. باتىردىڭ زيراتىنا كەسەنەنى ءدىلداحان دالەل ەسىمدى ازامات ءوز قاراجاتىمەن ورناتقالى وتىر»، – دەيدى ۇيىمداستىرۋشىلار القاسىنىڭ مۇشەسى امانتاي ءالحان ۇلى.

26 قىركۇيەك استانادان اتتانۋ

27 قىركۇيەك - شىعىس قازاقستان وبىلىسى جارما اۋدانى قالبا تاۋى باۋرايىندا باتىردىڭ كەسەنەسىنىڭ اشىلۋ راسىمىنە بولادى.

28-استاناعا قايتىپ كەلۋ.

بۇركىت نۇراسىل