حومس قالاسىنداعى عيماراتتاردىڭ 60% باشار اسادتىڭ اسكەري كۇشتەرىنەن قيراتىلعانىمەن،  الايدا «Apple» كومپانياسىنىڭ ەكس-باسشىسى ستيۆ دجوبستىڭ ءۇيىنىڭ مۇرتى دا بۇزىلماعان.

ايتا كەتەيىك، جۋىردا شۆەساريالىق كاسىپكەر ديەۆيد گالبرايت ءوزىنىڭ Twitter پاراقشاسىنا Apple كورپوراسياسىنىڭ نەگىزىن قالاۋشى ستيۆ دجوبستىڭ اكەسى سيريالىق بوسقىن ەكەندىگىن راستايتىن دەرەك جاريالاعان بولاتىن. بۇل تۋرالى «قامشى» پورتالى ummet.kz-كە سىلتەمە جاساي وتىرىپ حابارلايدى.

دجوبستىڭ اكەسى ابدەل فاتتاح ءال-دجاندالي ءۇيى ورنالاسقان اۋدان قالانىڭ باسىم بولىگى بۇزىلعان كەزدە دە امان قالدى، دەپ جازادى «زامان ال-ۆاسل» سيريالىق باسىلىمى.

جەرگىلىكتى تۇرعىنداردىڭ ايتۋىنشا، دجوبستىڭ ءۇيى ەرەكشە قورعاۋداعى ايماقتا بولعاندىقتان قارۋلى كۇش اينالىپ وتكەن كورىنەدى. بۇل ايماقتا سونداي-اق اسكەري قاۋىپسىزدىك قۇرىلىمى دا ورنالاسقان. سول سەبەپتى بۇل اۋدان بومبىلاۋعا ۇشىراماعان.

ەسكە سالا كەتسەك، سيريا اسكەري كۇشى ەلدەگى وپپوزيسيا كۇشتەرىنىڭ تۇرعىن ءۇي اۋداندارىن بومبالاپ، ايماقتى قاداعالاۋدا ۇستاۋدا. ال، Amnesty International حالىقارالىق قۇقىققورعاۋ ۇيىمى مەملەكەتتىك اسكەردىڭ بۇل ارەكەتتەرىن ادامزاتقا قارسى جاسالعان قىلمىس دەپ باعالادى.