جاقىندا ءو.ا.جولداسبەكوۆ اتىنداعى ستۋدەنتتەر سارايىندا «حۇسنيحات» ادەبيەتتى قولداۋ قورىنىڭ ۇيىمداستىرۋىمەن رەسپۋبليكامىزدا تۇڭعىش رەت «ءبىر ولەڭ، ءبىر اۋەن» اتتى ءان-جىر كەشى ءوتتى. بۇل تۋرالى «قامشى» پورتالى حابارلايدى.

ۇلى ابايدىڭ تۋعانىنا 170 تولۋىنا وراي، قازاق پوەزياسىن ناسيحاتتاۋ ماقساتىندا وتكىزىلگەن رۋحاني كەشكە قازاقستان جازۋشىلارى وداعىنىڭ ءتوراعاسى نۇرلان ورازالين باستاعان قازاق پوەزياسىنىڭ بۇگىنگى وكىلدەرى قاتىستى. ادەبيەت ايدىنىنداعى اعا بۋىن سانالاتىن يران-عايىپ، ءشومىشباي سارييەۆ، ءجۇرسىن ەرمان، جاركەن بودەش، يسرايل ساپارباي، ۇلىقبەك ەسداۋلەت، قاسىمحان بەگمانوۆ، عالىم جايلىباي، بايان بەكەتوۆا، ءادىلعازى قايىربەكوۆ، باۋىرجان جاقىپ، عالىم قاليبەك ۇلى، مارالتاي رايىمبەك ۇلى، سەرىك قالييەۆ، جاناربەك ءاشىمجان قاتارلى تانىمال اقىندار ولەڭ وقىپ، قازاق ەستراداسىنىڭ ونەرپازدارى باعدات سامەدينوۆا، زاتتىبەك كوپبوسىن ۇلى، گۇلنۇر ومىربايەۆا، روزا ءالقوجا، «قاراگوز» ءانسامبلى، جاقسىبەك قالەلبەك ۇلى ت.ب ونەر جۇلدىزدارى قاتىستى.

Kaztrans كومپانياسىنىڭ دەمەۋشلىگىمەن، «حۇسنيحات» ادەبيەتتى قولداۋ قورى ۇيىمداستىرعان «ءبىر ولەڭ، ءبىر اۋەن» كەشى بارىسىندا ارنايى دايىندالعان «اباي» سىيلىعى «الاش» حالىقارالىق ادەبي سىيلىعىنىڭ يەگەرى، اقىن عالىم جايلىبايعا تابىس ەتىلدى. م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، جازۋشى ءۋاليحان قاليجانوۆ «اباي» ەسىمى جازىلعان ارنايى توسبەلگىنى اقىننىڭ كەۋدەسىنە تاقتى. قازاق قالامگەرلەرىنىڭ ىشىنەن توپ جارعان عالىم اقىن: «مەن ءۇشىن ومىرىمدەگى ەڭ ۇلكەن سىيلىق – اباي سىيلىعى» دەپ اعىنان اقتارىلدى.

بۇل سىيلىق سونىمەن قاتار، ابايدىڭ ولەڭدەرى مەن قارا سوزدەرىن، مۇحتار اۋەزوۆتىڭ شىعارمالارىن جۇڭگو تىلىنە اۋدارعان، قحر تانىمال قالامگەرى، ابايتانۋشى، سىبە ۇلتىنىڭ جازۋشىسى قابايعا(حا حۋانچجان) دا تابىس ەتىلدى.

بۇل كونسەرت اتى ايتىپ وتىرعانداي ءان مەن جىردان شاشۋ شاشىپ، كورەرمەن كوڭىلىن تاپقان ادەمى كەش بولدى. «قامشى» پورتالى قازاق ادەبيەتىنە سۇبەلى ەڭبەك ءسىڭىرىپ جۇرگەن قوس قالامگەردى شىن جۇرەكتەن قۇتتىقتايدى!

 نۇرزات توعجان