كەشە قاسيەتتى قۇربان ايت مەرەكەسى قارساڭىندا قازاقستان پرەزيدەنتى نۇرسۇلتان نازاربايەۆ استاناداعى  "ازىرەت سۇلتان" مەشىتىنە باردى جانە قازاقستان حالقى مەن بۇكىل الەم مۇسىلماندارىن قۇربان ايت مەرەكەسىمەن قۇتتىقتادى. بۇل تۋرالى «قامشى» پورتالى Tengrinews.kz-كە سىلتەمە جاساي وتىرىپ حابارلايدى.

«بۇل كۇنى ادامدار وكپە-رەنىشتەرىن كەشىرىپ، بىر-بىرىنە جاقىن بولا تۇسەدى. سوندىقتان مەرەكە بىرىكتىرۋشى ءرول اتقارادى. ءبىزدىڭ حالقىمىز تاۋەلسىزدىك العاننان كەيىن يسلام دىنىمەن قايتا قاۋىشتى. سونىڭ ارقاسىندا دامۋ باعىتىنداعى جولىمىزدى جالعاستىرا وتىرىپ، بىرلىگىمىز بەن تاتۋلىعىمىزدى نىعايتتىق»، - دەدى نۇرسۇلتان نازاربايەۆ مولدانىڭ نامازىنان كەيىن.

نۇرسۇلتان نازاربايەۆ سونداي-اق قازىرگى زامانداعى قاقتىعىستاردىڭ نەگىزگى سەبەپتەرىنە دە توقتالدى. «بۇلار - ەڭ ءبىرىنشى جەر اۋماعىنا بايلانىستى داۋلار. ءبىز وسىنداي داۋ تۋماۋى ءۇشىن كورشى ەلدەرمەن ۋاعدالاستىق ارقىلى شەكارامىزدى بەكىتتىك. ەكىنشى - ەتنوسارالىق قاقتىعىستار. ءوز ۇلتىن وزگەدەن جوعارى ساناۋ - اسا ۇلكەن كۇنا. ءبىز قازاقستاندا كوپۇلتتى حالىقتىڭ بىرلىگىن قامتاماسىز ەتتىك. ەتنيكالىق تەگىنە قاراماستان، اركىمدى دە قۇرمەتتەي وتىرىپ، ەلدەگى تۇراقتىلىقتى نىعايتتىق»، - دەدى مەملەكەت باسشىسى.
قاقتىعىستاردىڭ ءۇشىنشى سەبەبى، ونىڭ ايتۋىنشا - ءدىنارالىق قاقتىعىستار، مۇنى قازىرگى ۋاقىتتا بۇكىل الەمنەن بايقاۋعا بولادى.

«ەلىمىزدىڭ مۇسىلماندارى ءوز ءدىنىن ۇستانا وتىرىپ، وزگەلەردى قۇرمەتتەيدى. سونىڭ نەگىزىندە ءبىز حالىقتىڭ بىرلىگى مەن دوستىعىن قامتاماسىز ەتتىك. سوندىقتان حالقىمىزدى ءوز دىنىندە مەيىرىمدىلىك پەن قايىرىمدىلىق جولىن تاڭداۋعا جانە وسكەلەڭ ۇرپاقتى وسى باعىتتا تاربيەلەۋگە شاقىرامىن»، - دەپ قورىتىندىلادى پرەزيدەنت ءوز ءسوزىن.