“باراحولكا” بازارىنان تاعى دا شۋ شىقتى.  قازاقستانعا، ءتىپتى، ورتالىق ازياعا تانىمال، التىن-كۇمىس زەرگەرلىك بۇيىمدارىن ساۋدالايتىن بازاردىڭ ساتۋشىلارى باس كوتەردى.ولاي ەتپەسكە شارا قالماعان.  بۇل تۋرالى «قامشى» پورتالى 31 ارناعا سىلتەمە جاساي وتىرىپ حابارلايدى.

وقيعا بىلاي ءوربيدى. باراحولكانىڭ  “التىن قاتارى” سولتۇستىك اينالما جولىنىڭ بويىنداعى ورتەنبەگەن بىرنەشە بازاردىڭ ءبىرى. ءبىراق، ءورت قاۋىپسىزدىگى ساقتالماعان ەكەن. وسىعان وراي توتەنشە جاعدايلار قىزمەتكەرلەرى ەسكەرتۋ جاساپ، بازار باسشىلارىن جاۋاپقا تارتقان. ەسكەرتۋدەن كەيىن، كەمشىلىكتەر تۇزەتىلىپ، جاعدايدى رەتتەلسە كەرەك.  ءبىراق كەشە، ياعني 25 قىركۇيەكتە جۇمىسقا كەلگەن ساۋداگەرلەردى سوت ورىنداۋشىلارى كۇتىپ تۇردى.

“بازار جابىلادى دەپ ەسكەرتكەن جوق. تاڭەرتەڭ جۇمىسقا كەلدىك. شىعىڭدار دەپ قۋالاپ مال سياقتى شىعارىپ جىبەردى. ەشكىم ەسكەرتكەن جوق. بازاردىڭ ارەنداسىن، سالىعىن تولەپ وتىرمىز. ارەندانى ءۇش-اق كۇن بولدى جينالعانىنا. ەشقانداي حابار ايتىلعان جوق”، – دەيدى  ساۋداگەر ءجۇسىپ سۋانوۆ.

ءبىر توپ ساۋداگەر بازار باسشىلارى تۋرالى تەك جاقسى پىكىر بىلدىرۋدە. جاۋاپقا تارتىلعان “التىن قاتاردىڭ” اكىمشىلىگى بازاردى جابۋ نەگىزسىز دەيدى. ايتۋلارىنشا، ساۋدا ورنى بارلىق تالاپقا ساي. التىن-كۇمىستەرىن جيىپ، بازار سىرتىنا توپتاسقان ساتۋشىلار بىرنەشە ايدان بەرى زاڭ ورىندارىنان باقىلاۋ كۇشەيتىلگەنىن ايتادى. ال سوتتىڭ شەشىمىن ورىنداۋعا كەلگەن تۇلعالار بازاردى جابۋ تۋرالى الدىن-الا ەسكەرتىلدى دەيدى.