شىمكەنتتەگى اتقا مىنەرلەر يت پەن مىسىقتى جەرلەۋگە ارنالعان مولانى زاڭداستىرماقشى. بۇل تۋرالى «قامشى» پورتالى كتك ارناسىنا سىلتەمە جاساي وتىرىپ حابارلايدى. وسىدان 9 جىل بۇرىن العاش  رەت ءتورتاياقتى  جەرگە «ارۋلاپ» كومىلىپ، بۇگىنگى تاڭدا  تۇتاستاي قورىمعا اينالعان ايماق بار. ول جەرگە جانۋارلارىن جەرلەۋ راسىمىمەن كومەتىندەر جىل وتكەن سايىن ارتىپ كەلەدى.

شىمكەنتتىڭ  سىرتىنداعى ادامدار زيراتىمەن قاتارلاس ورنالاسقان حايۋاناتتار قورىمىندا ءقازىر 100-گە تارتا جانۋار كومىلگەن ەكەن .

 ول  بەيىتتە يت پەن مىسىق، ءتىپتى اتجالمان مەن ەگەۋقۇيرىقتىڭ مۇردەلەرى جاتىر. حايۋانداردى انا دۇنيەگە سالتاناتپەن شىعارىپ سالۋ، ولاردىڭ باسىنا ەسكەرتكىش قويۋ ءبىز ءۇشىن جەتىستىك پە الدە كەرى كەتۋشىلىك پە؟ ءبىر كۇنى يت پەن مىسىعىنىڭ جانازاسىن شىعارتۋ ءۇشىن يمام ىزدەپ جۇرگەن قازاقتى كەزىكتىرمەسەك بولعانى. يمام ىزدەگەندى قايدام، ءبىراق شىمكەنت قالاسى تۇرعىنۇي-كوممۋنالدىق شارۋاشىلىق ءبولىمى باسشىسىنىڭ ورىنباسارى ەرلان ەسىركەپوۆ : “ءقازىر جانۋارلارعا ارنالعان مولانىڭ قۇجاتتارى جوق. ءبىراق، ءبىز زاڭداستىرۋ ماسەلەسىن قاراپ جاتىرمىز. مۇمكىن كەلەسى جىلى جانۋارلارعا ارنالعان قورىمدى راسىمدەپ تە بەرەمىز دەپ ويلايمىن”،-دەپ تۇسىنىكتەمە بەرىپتى.