شىمكەنت قالاسىنداعى پەريناتالدىق ورتالىقتا كەزەكتى ۇشەمدەر دۇنيەگە كەلدى. قالا تۇرعىنى جاننا مەلدەشوۆا جۇكتىلىكتىڭ 34ء-شى اپتاسىندا ايىم، راحات، ايالا ەسىمدى سابيلەردى دۇنيەگە اكەلدى. شاقالاقتار 28 شىلدە كۇنى تۋعان. اناسى مەن بالالاردىڭ قازىرگى دەنساۋلىعى جاقسى.

ۇشەمنىڭ اناسى تۇڭعىشىن 2010 جىلى تۋعان. سول ۋاقىتتان بەرى دەنساۋلىعى سىر بەرىپ، جۇكتى بولۋدى ۇزاق جىلدار بويى جوسپارلاپ ءجۇرىپتى. وسىلايشا ەرلى-زايىپتىلاردىڭ ون جىلدان بەرى بالا سۇيگىسى كەلگەن ارماندارى ورىندالىپ، اناسى بىردەن ءۇش پەرزەنتتى دۇنيەگە اكەلدى.
مەرزىمىنەن بۇرىن تولعاعى باستالعان جۇكتى كەلىنشەك پەن ءۇش شاقالاقتىڭ ءومىرىن امان الىپ قالۋ ءۇشىن دارىگەرلەر كەسار تىلىگىن جاساپ، وپەراسيا ارقىلى ءساتتى بوساندىرىپ الدى. دۇنيەگە ەكى قىز، ءبىر ۇل بالا كەلدى.

ۇشەمدەرگە پەريناتالدىق ورتالىقتىڭ نەوناتولوگتارى ەرەكشە كۇتىم جاسادى. بىلىكتى مەديسينا ماماندارىنىڭ قاراۋىندا بولعان شاقالاقتاردىڭ ءبىر اپتا ىشىندە دەنساۋلىقتارى وڭالىپ، اناسىمەن بىرگە ۇيىنە شىعارىلدى.

ايتا كەتەيىك، جىل باسىنان بەرى قالادا 19 797 ءسابي دۇنيە ەسىگىن اشقان. ولاردىڭ 135ء-ى ەگىز بولسا، تورتەۋى ۇشەم.