ەرتەڭ ەلىمىزدە ەمحاناعا تىركەلۋ ناۋقانى باستالادى. ەكى ايعا سوزىلاتىن جىل سايىنعى ءداستۇرلى شارا 15-قاراشادا اياقتالادى. بۇل تۋرالى اقپاراتتىق-كوممۋنيكاسيالىق ورتالىعىندا وتكەن بريفينگتە شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ مالىمدەدى.
باسقارما باسشىسىنىڭ سوزىنشە، ەلىمىزدىڭ ءار ازاماتى جىلىنا ءبىر رەت ەمحانانى ەركىن تاڭداي الادى.
«ەمحانانى تاڭداۋ ناۋقانى ەكى ايعا سوزىلادى. ياعني، 15-قىركۇيەك پەن 15-قاراشا ارالىعىندا. قازاقستاننىڭ كەز-كەلگەن ازاماتى وسى ناۋقانعا قاتىسىپ، ءوزىنىڭ ەمحاناسىن تاڭداي الادى. ناۋقاننىڭ ماقساتى - قارالىپ جۇرگەن ەمحاناسىنا كوڭىلى تولمايتىن ازاماتتارعا ەمدەۋ مەكەمەسىن اۋىستىرۋعا مۇمكىندىك بەرۋ»،-دەدى ب.پوزيلوۆ.
بريفينگ بارىسىندا ءسوز العان «الەۋمەتتىك مەديسينالىق ساقتاندىرۋ قورى» شىمكەنت قالاسى بويىنشا فيليالىنىڭ ديرەكتورى ءسابيت قۇرالبەك بىلتىرعى تىركەۋ ناۋقانى بارىسىندا 18 مىڭنان استام قالا تۇرعىنى ەمحانا تاڭداۋ قۇقىعىن پايدالانعانىن اتاپ ءوتتى. ونىڭ ايتۋىنشا، ەمحانا تاڭداۋ بارىسىندا تۇرعىنداردىڭ باسىم بولىگى مەملەكەتتىك ەمحاناعا تىركەلگەن ەكەن.
ايتا كەتەيىك، بيىل مەديسينالىق-سانيتاريالىق العاشقى كومەك كورسەتەتىن مەديسينالىق ۇيىمدارعا تىركەلۋ تارتىبىنە وزگەرىستەر ەنگىزىلدى. ولار تەك شەتەلدىك ازاماتتار مەن ەڭبەك ميگرانتتارىنا قاتىستى بولادى دەيدى مىندەتتى الەۋمەتتىك مەديسينالىق ساقتاندىرۋ قورىنىڭ وكىلدەرى.
جاڭا قاعيدالارعا سايكەس، ەلدىڭ اۋماعىندا ۋاقىتشا بولاتىن نەمەسە باسپانا ىزدەپ جۇرگەن ازاماتتىعى جوق شەتەلدىك ادامداردى ەمحاناعا بەكىتۋ ەرىكتى مەديسينالىق ساقتاندىرۋ شارتىنىڭ نەگىزىندە جانە ونىڭ قولدانىلۋ مەرزىمىنە عانا جۇزەگە اسىرىلادى. وسىدان كەيىن ولار مەديسينالىق ۇيىمنان اۆتوماتتى تۇردە شىعارىلادى.
ەمحاناعا تىركەۋ نەمەسە قايتا بەكىتۋ كەزىندە ەمحانانى تۇرعىلىقتى جەرىنە جاقىن جەردەن تاڭداۋ ۇسىنىلادى. سەبەبى ناۋقاس مەديسينالىق كومەكتى قاجەت بولعاندا، ۋچاسكەلىك دارىگەر ۇيىنە بارا الاتىنداي بولۋى ءتيىس. بۇل اسىرەسە پاندەميا كەزىندە وتە ماڭىزدى دەيدى ماماندار.
ايتا كەتەيىك، قالا بويىنشا بۇگىنگى تاڭدا 14 مەملەكەتتىك جانە 87 جەكەمەنشىك ەمحانا بار.
پىكىر قالدىرۋ