«Nur Otan» پارتياسىنىڭ ءتوراعاسى، ەلباسى نۇرسۇلتان نازاربايەۆ 2019 جىلى «جاستار جىلى» اياسىندا «جاس مامان» جوباسىن ازىرلەۋدى تاپسىرعان بولاتىن. اتالعان جوبانىڭ باستى ماقساتى – ەلىمىزدە ەڭ كوپ تالاپ ەتىلەتىن 100 كاسىپ بويىنشا 180 كوللەدج بەن 20 ۋنيۆەرسيتەتتى جاڭارتۋ مەن بىلىكتى مامانداردى دايارلاۋدىڭ حالىقارالىق تاجىريبەسىن ەنگىزۋ بولىپ تابىلادى.
اتالعان جوبا نەگىزىندە اتقارىلعان جۇمىستارمەن تانىسۋ ءۇشىن شىمكەنتكە پارلامەنت ءماجىلىسىنىڭ دەپۋتاتى، «Nur Otan» پارتياسى فراكسياسىنىڭ مۇشەسى سۇلەيمەنوۆا جۇلدىز دوسبەرگەن قىزى ارنايى ىس-ساپارمەن كەلىپ، ءبىرقاتار وقۋ ورىندارىن ارالادى. سونىمەن قاتار ول «Nur Otan» پارتياسىنىڭ «وزگەرىستەر جولى: بارشاعا لايىقتى ءومىر!» اتتى سايلاۋالدى باعدارلاماسىن شىمكەنت قالاسى بويىنشا ىسكە اسىرۋ ماقساتىندا ازىرلەنگەن جول كارتاسىنىڭ ورىندالۋى بويىنشا بىرنەشە مەكتەپتەردىڭ وقۋ پروسەسىمەن دە تانىستى.
ءماجىلىس دەپۋتاتى الدىمەن وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ جۇمىسىمەن تانىستى. «رۋحاني جاڭعىرۋ» باعدارلاماسىنىڭ «جاڭا گۋمانيتارلىق ءبىلىم: قازاق تىلىندەگى 100 جاڭا وقۋلىق» جوباسى اياسىندا ۋنيۆەرسيتەتتە 2018 جىلى شىلدەدە اشىلعان كوۆوركينگ ورتالىعىن كوردى. «Nur Otan» پارتياسىنىڭ «ءىت ماماندار دايىنداۋ» جوباسى شەڭبەرىندە بالالاردى باعدارلامالاۋعا جانە ءىت-ماماندىقتارىنىڭ داعدىلارىنا ۇيرەتەتىن التى اقىسىز «IT-SYNYP» سىنىپتارى اشىلعان. «IT-SYNYP» كوپيۋتەرلىك سىنىپتارى Wi-Fi ايماقتا ورنالاسقان، مۋلديمەديالىق پوديۋمدارمەن قامتىماسىز ەتىلگەن، نر-24 كومپيۋتەرلىك 80 مونوبلوكپەن، جوعارى جىلدامدىقتى ينتەرنەتكە (100 مبيت/س) قوسىلعان Web-كامەرالارمەن جابدىقتالعان. سايلاۋالدى باعدارلامانىڭ جۇيەلى ورىندالۋى پىسىقتالدى.
كەلەسى نىسان №5 «جەڭىل ونەركاسىپ جانە سەرۆيس كوللەدجىنىڭ» ۇجىمىمەن كەزدەسىپ، وقۋ ورنىنىڭ ماتەريالدىق-تەحنيكالىق جاعدايىمەن تانىستى. اتالمىش ءبىلىم مەكەمەسىندە بۇگىنگى تاڭدا مىڭنان اسا شاكىرت تاربيەلەنۋدە. ولار تىگىن ءوندىرىسى جانە كيىمدەردى ۇلگىلەۋ، تىگىنشى، ارنايى تىگىنشى، مودەلەر-پىشۋشى، تەحنيك-تەحنولوگ، توقىما ءوندىرىسى، توقىما ماشيناسىنىڭ وپەراتورى ماماندىقتارى بويىنشا ءبىلىم الۋدا.
ودان سوڭ ءماجىلىس دەپۋتاتى شىمكەنتتەگى «جول-كولىك كوللەدجىنە» باردى. اتالعان ءبىلىم مەكەمەسىنىڭ «جاس مامان» جوباسى بويىنشا ماتەريالدىق-تەحنيكالىق بازاسىن حالىقارالىق ستاندارتتار تالاپتارىنا ساي سوڭعى زاماناۋي ۇلگىدەگى قۇرال-جابدىقتارمەن قامتاماسىز ەتۋ ءۇشىن مەملەكەت ەسەبىنەن قاجەتتى قاراجاتتار بولىنگەن. سوعان سايكەس، وقۋ ورنىنداعى «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ»، «تەمىر جول كولىگىندەگى اۆتوماتيكا، تەلەمەحانيكا جانە قوزعالىستى باسقارۋ» ماماندىقتارى بويىنشا ەڭبەك نارىعىندا سۇرانىسقا يە بىلىكتى ماماندار دايارلاۋ، ولاردىڭ كاسىبي بىلىكتىلىگىن دامىتۋ ماقساتىندا 264 ملن. تەڭگەگە قاجەتتى قۇرال-جابدىقتار ساتىپ الىنعان. «جاس مامان» جوباسى بويىنشا كوللەدجدىڭ اۆتومەحانيكا ءبولىمى مەن تەمىرجول بولىمدەرىنىڭ زەرتحانالارى مەن كابينەتتەرى تالاپقا ساي زاماناۋي قۇرالدارمەن جابدىقتالعان. سونىمەن قاتار، گاراج كەشەنىندە زەرتحانالىق كابينەت اشىلىپ، جاڭا قۇرال-جابدىقتار ورناتىلعان.
«جاس مامان» جوباسى اياسىندا «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ» ماماندىعى بويىنشا 33، «اۆتوموبيل كولىگىنە تەحنيكالىق قىزمەت كورسەتۋ، جوندەۋ جانە پايدالانۋ» ماماندىعى بويىنشا 9، «تەمىر جول كولىگىندەگى اۆتوماتيكا، تەلەمەحانيكا جانە قوزعالىستى باسقارۋ» ماماندىعى بويىنشا 22 اتاۋلى قۇرال-جابدىقتار الىنعان. جالپى «جاس مامان» جوباسى اياسىندا كوللەدجدەردىڭ ماتەريالدىق-تەحنيكالىق بازاسىن حالىقارالىق ستاندارتتار تالاپتارىنا ساي، سوڭعى زاماناۋي ۇلگىدەگى قۇرال-جابدىقتارمەن قامتاماسىز ەتۋ – ءبىلىم ساپاسىن كوتەرۋ جولىندا وڭ سەرپىن بەرەرى ءسوزسىز.
جۇلدىز دوسبەرگەن قىزى بەت العان كەزەكتى نىسان «سايرام كومەكشى ينتەرنات-مەكتەپ-كوللەدجى» بولدى. «Nur Otan» پارتياسىنىڭ «كەدەرگىسىز كەلەشەك» جوباسى اياسىندا «سايرام كومەكشى مەكتەپ-ينتەرناتى» مەكەمەسىنىڭ ەسكى عيماراتى تولىق ءسۇرىلىپ، ونىڭ ورنىنا زاماناۋي تالاپتارعا ساي جاڭا عيمارات بوي كوتەرگەن. العاشىندا بالالار ءۇيى بولىپ قۇرىلىپ، كەيىننەن كومەكشى مەكتەپ-ينتەرناتى قىزمەتىنە كوشكەن نىسان ەندى «سايرام كومەكشى مەكتەپ-ينتەرنات-كوللەدج» ارنايى كەشەنى» كوممۋنالدىق مەملەكەتتىك مەكەمەسى بولىپ وزگەرتىلدى.
بۇگىندە شىمكەنت قالاسىنىڭ ءبىلىم باسارماسىنا قارايتىن كوللەدجدەگى قۇرىلىس جۇمىستارى 95 پايىزعا اياقتالعان. ءوز كەزەگىندە كوللەدجدە ءۇش قاباتتى وقۋ عيماراتىنان بولەك 100 ورىنعا لايىقتالعان اسحانا، اكت زالى، سپورت زال، اعاش وڭدەۋ جانە تىگىن شەبەرحانالارى بار.
ارنايى وقىتۋدى قاجەت ەتەتىن بالالار اتالعان مەكتەپ-ينتەرنات-كوللەدجىن ءتامامداعان سوڭ، ارنايى ماماندىقتار بويىنشا ديپلوم الىپ شىعادى. بۇل ءبىلىم مەكەمەسى قازاقستاندا تۇڭعىش رەت كومەكشى مەكتەپ كوللەدج مارتەبەسىن الىپ وتىر.
جالپى اتالعان مەكەمەدەگى اۋقىمدى قۇرىلىس جۇمىسى «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» اتتى 2021-2025 جىلدارعا ارنالعان شىمكەنت قالاسى بويىنشا سايلاۋالدى باعدارلاماسىن ىسكە اسىرۋ بويىنشا ازىرلەنگەن جول كارتاسىنداعى كەشەندى ءىس-شارالار قاتارىندا.
مەكتەپ-ينتەرنات-كوللەدجدىڭ جۇمىسىمەن تولىق تانىسقان ج. دوسبەرگەن قىزى مەكتەپ باسشىلىعى مەن قىزمەتكەرلەر تاراپىنان جۇمىس بارىسىندا قانداي كەدەرگىلەر بارىن سۇرادى. ءوز كەزەگىندە مەكتەپ ۇجىمى دەپۋتات نازارىنا ءبىرقاتار ماسەلەلەردى كولدەنەڭ تارتتى. اتاپ ايتقاندا، بالا قۇقىقتارىن قورعاۋ تۋرالى زاڭنىڭ 30-بابىندا جازىلعان «ارناۋلى ءبىلىم بەرۋ ۇيىمدارىندا 11 جاستان 18 جاسقا دەيىنگى ديەۆيانتتى مىنەز قۇلىقتى بالالار ورنالاستىرىلادى» دەگەندى «ارنايى مەكتەپ ينتەرنات ۇيىمدارىندا» دەگەن سويلەم قوسۋدى قاراستىرۋدى، ازاماتتىق قىزمەتشىلەرگە، مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە، قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى № 1193 قاۋلىسىنا وزگەرىس ەنگىزۋىن، ەرەكشە وقىتۋدى قاجەت ەتەتىن مەكتەپ-ينتەرنات ۇستازدارى مەن تاربيەشىلەرىنە زياندىلىق ءۇشىن ەڭبەكاقىسىنا ۇستەمە جالاقى 25 % تولەنۋىن اتاپ ءوتتى. ءوز كەزەگىندە كەڭەس ءتوراعاسى ج. دوسبەرگەن قىزى ايتىلعان ۇسىنىستاردى جان-جاقتى زەردەلەپ، ونىڭ وڭ شەشىمىن تابۋىنا ىقپال ەتەتىنىن ايتتى.
ءماجىلىس دەپۋتاتى، «Nur Otan» پارتياسىنىڭ جانىنداعى ءبىلىم جانە عىلىمدى دامىتۋ جونىندەگى رەسپۋبليكالىق كەڭەستىڭ ءتوراعاسى، فراكسيا مۇشەسى جۇلدىز دوسبەرگەن قىزىنىڭ جۇمىس ساپارى قالاداعى جەكەمەنشىك نەگىزدە اشىلعان مەكتەپتەردىڭ وقۋ پروسەسىمەن تانىسۋمەن جالعاستى.
«Nur Otan» پارتياسىنىڭ «وزگەرىستەر جولى: بارشاعا لايىقتى ءومىر!» اتتى سايلاۋالدى باعدارلاماسىن شىمكەنت قالاسى بويىنشا ىسكە اسىرۋ ماقساتىندا ازىرلەنگەن جول كارتاسىندا ءبىلىم سالاسى بويىنشا 13 تاپسىرما بار. بۇگىندە ونىڭ 5ء-ۋى تولىق ورىندالعان. ءبىلىم سالاسى بويىنشا ورىندالۋى ءتيىس ءىس-شارالاردىڭ قاتارىندا ءۇش اۋىسىمدى مەكتەپ ماسەلەسىن شەشۋ كوزدەلگەن. وسى ماقساتتا قالادا جەكەمەنشىك مەكتەپتەر اشىلعان. سونىڭ ءبىرى «ال-فارابي» اكادەميالىك مەكتەبى. اتالعان نىسان ءاۋ-باستا تويحاناعا ارنالىپ سالىنعان عيمارات (وڭتۇستىك قابىلداۋ ءۇيى) بولاتىن. كەيىننەن جان باسىنا قارجىلاندىرۋ ەسەبىنەن قايتا قۇرىلىمداۋ ارقىلى مەكتەپ بولىپ وزگەرتىلگەن. سوڭعى كەزدەرى ءدال وسى مەكتەپتەگى وقۋ پروسەسى بويىنشا الەۋمەتتىك جەلىدە اتا-انالار تاراپىنان شاعىمدار تۇسكەن. وسىعان وراي ءماجىلىس دەپۋتاتى اتالعان مەكتەپكە ارنايى بارىپ، وقۋ پروسەسى بويىنشا بىرنەشە ۇسىنىستار ايتتى. دەپۋتات ايتىلعان ۇسىنىستاردىڭ بارلىعى پارتيا باقىلاۋىندا بولاتىنىن اتاپ ءوتتى.
قازىرگى تاڭدا «ال-فارابي» اكادەميالىك مەكتەبىندەگى 1386 وقۋشىنىڭ ءبىلىم دەڭگەيىن كوتەرۋ ءۇشىن فينليانديا ەلىنىڭ وقۋ باسقارماسىمەن كەلىسىم شارت جاسالعان. سونىڭ نەگىزىندە وقۋشىلار فيندىق جۇيە بويىنشا ءبىلىم الۋدا.
بۇدان بولەك ءماجىلىس دەپۋتاتى «نيزامحان» ورتا مەكتەبىنىڭ جۇمىسىمەن تانىستى. اتالعان ءبىلىم ۇياسىندا مەملەكەتتىك ستاندارتقا سايكەس ءبىلىم بەرىلەدى. وقۋ ەكى تىلدە جۇرگىزىلىپ، بالالار تەگىن وقىتىلادى. ول جەردە وقۋشىلارعا قوسىمشا ۇيىرمەلەر، سپورت سەكسيالارى، روبوتوتەحنيكا، بي، دومبىرا ۇيىرمەلەرى اشىلعان.
شىمكەنت قالاسى بويىنشا پارتيانىڭ سايلاۋالدى باعدارلاماسىن ىسكە اسىرۋ ءۇشىن ازىرلەنگەن جول كارتاسىنداعى 149 كەشەندى ءىس-شارانىڭ قاتارىندا ءۇش اۋىسىمدى مەكتەپ ماسەلەسىن تۇپكىلىكتى شەشۋ كوزدەلگەن. بالالاردى ساپالى ءبىلىم بەرۋ جانە ءۇش اۋىسىمدى مەكتەپ سانىن ازايتۋ “Nur Otan“ پارتياسىنىڭ باقىلاۋىندا. وسى ماقساتتا قالانىڭ سولتۇستىك بولىگىندە ورنالاسقان «تۇران» شاعىن اۋدانىندا بيىل 1200 ورىنعا لايىقتالعان مەكتەپ پايدالانۋعا بەرىلگەن. قازىرگى تاڭدا اتالعان اۋداندا تۇرعىن ءۇي قۇرىلىسى قارقىن العان. ياعني، الداعى ۋاقىتتا ونداعى تۇرعىندار سانى ارتا تۇسەتىنى بەلگىلى. سوعان سايكەس كەلەر جىلى مەكتەپتەگى وقۋشىلار سانى 2 مىڭعا دەيىن جەتەدى دەگەن بولجام بار.
اتالعان ءبىلىم ۇياسىنا ارنايى بارعان ءماجىلىس دەپۋتاتى جۇلدىز سۇلەيمەنوۆا ونداعى وقۋ پروسەسىن باقىلاپ، جاڭا وقۋ عيماراتىنىڭ زامان تالابىنا ساي جاراقتاندىرىلعانىن اتاپ ءوتتى. سونىمەن قاتار ول، وقۋشىلاردى جاڭا وقۋ جىلىنىڭ باستالۋىمەن قۇتتىقتاپ، ولارعا ساتتىلىك تىلەدى. ايتا كەتەيىك، بيىل قالادا 5 ءۇش اۋىسىمدى مەكتەپتىڭ ماسەلەسى وڭ شەشىلىپ، ولاردىڭ سانى 14-تەن 9-عا ازايادى.
پىكىر قالدىرۋ