شىمكەنت حالىق سانى قارقىندى ءوسىپ جاتقان قالا ساناتىندا. قالامىزدى زاماناۋي ءبىلىم ورتالىعىنا اينالدىرۋ – ۋاقىت تالابى. شاھاردىڭ باستى بايلىعى – ونىڭ تۇرعىندارى. ادامي كاپيتالدى ارتتىرۋ مىندەتى قالامىزدىڭ بەس جىلدىق دامۋ جوسپارىنىڭ ماڭىزدى تارماعى رەتىندە ەندى.

الداعى بەس جىلدىق كەزەڭدە اپاتتى، ءۇش اۋىسىمدى مەكتەپتەر ماسەلەسى تۇپكىلىكتى شەشىلىپ، ىڭعايلاستىرىلعان عيماراتتاردا ورنالاسقان مەكتەپتەردىڭ ورنىنا تيپتىك ۇلگىدەگى مەكتەپتەر سالىنباق.

وسى جوسپار اياسىندا بيىلعى جاڭا وقۋ جىلىندا ءبىر مەزەتتە 20 جاڭا مەكتەپ ىسكە قوسىلدى. جىل سوڭىنا دەيىن تاعى 4 مەكتەپتىڭ قۇرىلىسى اياقتالىپ، وقۋشىلاردى قابىلدايدى.

ءبىلىم بەرۋ ۇيىمدارىنىڭ قۇرىلىس قارقىنىن ارتتىرۋدا مەملەكەتتىك-جەكەمەنشىك ارىپتەستىك وڭ ناتيجەسىن بەرۋدە. بيىلعى جىلى قۇرىلىسى اياقتالىپ، تاپسىرىلعان ءبىلىم بەرۋ ۇيىمدارىنىڭ ىشىندە 15 مەكتەپ مەملەكەتتىك-جەكەمەنشىك ارىپتەستىك شەڭبەرىندە پايدالانۋعا بەرىلدى.

وسى ساناتتاعى جاڭا ءبىلىم بەرۋ ۇيىمدارىنىڭ ءبىرى – «Abadan» جەكەمەنشىك مەكتەبى. ۇيىم 550 بالاعا ءبىلىم بەرۋگە لايىقتالعان. ءقازىر مۇندا 350 وقۋشى ءبىلىم الۋدا. ساباقتار قازاق جانە ورىس تىلدەرىندە جۇرگىزىلەدى. وقۋشىلارعا قوسىمشا ساباق رەتىندە اعىلشىن ءتىلىن تەرەڭدەتىپ وقىتۋ كۋرستارى ۇيىمداستىرىلعان. بالالاردىڭ تۇلعالىق دامۋىن قامتاماسىز ەتۋدە شاحمات، دومبىرا، حورەوگرافيا، بەينەلەۋ ونەرى سىندى شىعارماشىلىق ۇيىرمەلەر جۇمىس ىستەيدى.

وقۋ كەشەنىندە 24 سىنىپتىق كابينەت وقۋ جابدىقتارىمەن قامتىلعان، اكت جانە سپورت زالدارى، مەديسينالىق بەكەت جانە اسحانا بولمەلەرى قاراستىرىلعان.

مەكتەپتىڭ پەداگوگ كادرلارىنىڭ الەۋەتىن 45 جوعارى بىلىكتى مۇعالىمدەردەن قۇرالعان. مۇندا بالالار جالپىعا بىردەي ءبىلىم ستاندارتى بويىنشا ساباق وتەدى. وقۋشىلاردىڭ ۇلگەرىمى مەن پەداگوگ كادرلاردىڭ بىلىكتىلىك دەڭگەيىنە تۇراقتى نەگىزدە ىسكە اساتىن باقىلاۋ جۇيەسى ەنگىزىلگەن.