شىمكەنتتە حالىق سانى قارقىندى ءوسىپ كەلەدى. ميلليونان استام تۇرعىنى بار قالانىڭ مەكتەپتەرىنە بيىل 233 مىڭنان استام وقۋشى باردى. ونىڭ ىشىندە 25 مىڭ بالا مەكتەپ تابالدىرىعىن العاش مارتە اتتادى.

حالىق سانىنىڭ ءوسۋى جاڭا مەكتەپتەر اشۋ ماسەلەسىن وزەكتەندىردى. مەكتەپتەر جەتىسپەۋشىلىگى ماسەلەسىن شەشۋدە مەملەكەتتىك-جەكەمەنشىك ارىپتەستىك وڭ ناتيجەسىن كورسەتىپ كەلەدى. قالانىڭ ىسكەرلىك ورتاسى ءبىلىم سالاسىن جەتىلدىرۋگە ۇلەس قوسۋدا. ءقازىر شىمكەنت ءبىلىم سالاسىنا ينۆەستيسيا تارتۋ بويىنشا رەسپۋبليكادا كوشباسشى قالا ساناتىندا.

مەملەكەتتىك-جەكەمەنشىك ارىپتەستىك شەڭبەرىندە تابىستى جۇزەگە اسقان جوبالاردىڭ ءبىرى - «TM and ART educational school» مەكتەبى. قونايەۆ داڭعىلى بويىنداعى بۇرىڭعى ساۋدا ورتالىعى باستاۋىش مەكتەپ رەتىندە قايتا قۇرىلىمداۋدان وتكىزىلىپ، بيىلعى وقۋ جىلىندا العاشقى وقۋشىلارىن قابىلدادى. ءقازىر مەكتەپكە 202 بالا قابىلدانىپ، ەلىمىزدە قابىلدانعان جالپى ءبىلىم بەرۋ ستاندارتتارىنا ساي قازاق جانە ورىس تىلىندەگى وقۋ سىنىپتارى اشىلعان.

جەكەمەنشىك ءبىلىم بەرۋ نىسانىندا موديفيكاسيالانعان ءپان كابينەتتەرى جاساقتالعان، وقۋ سىنىپتارى ينتەراكتيۆتى تاقتالار جانە پانەلدەرمەن جابدىقتالعان. بالالار قاۋىپسىزدىگىن ساقتاۋدا بەينەباقىلاۋ جۇيەلەرى ورناتىلىپ، اتا-انالار ءوز پەرزەنتتەرىنىڭ ءبىلىم بەرۋ ۇيىمىنداعى ءىس-قيمىلىن سمارتفون ارقىلى ونلاين-رەجيمدە باقىلاي الادى. مەكتەپتە سپورتزال، كىتاپحانا، اسحانا، گيمناستيكالىق زال قاراستىرىلىپ، روبوتوتەحنيكا ءپان كابينەتتەرى جاساقتالعان.

مەكتەپتە اتا-انالاردىڭ قالاۋى بويىنشا اقىلى تۇردە ءتۇرلى شىعارماشىلىق توپتار مەن ۇيىرمەلەر جۇمىس ىستەيدى. ديزاين، تاەكۆاندو، دزيۋدو، حورەوگرافيا، كوركەم گيمناستيكا، ەتيكا، سۋرەت سالۋ، برەيك-دانس جانە اعىلشىن ءتىلى ۇيىرمەلەرىنىڭ جەتەكشىلىگىنە كاسىبي ماماندار، ونىڭ ىشىندە جوعارى بىلىكتى شەتەلدىك ۇستازدار تارتىلعان. ءبىلىم بەرۋ ۇيىمىندا لوگوپەد مامان دا قاراستىرىلىپ، ءتىل كەمىستىگى بار بالالاردى دۇرىس سويلەي بىلۋگە داعدالاندىرادى.

جەكەمەنشىك ءبىلىم بەرۋ ۇيىمدارىنا بيۋدجەتتىك مەكتەپتەرگە قويىلاتىن تالاپتار قولدانىلادى. ۇستازداردىڭ بىلىكتىلىگى مەن بالالاردىڭ ءبىلىم دەڭگەيى سالالىق مەملەكەتتىك قۇرىلىمدار تاراپىنان تۇراقتى باقىلاۋدا بولادى.