«Nur Otan» ءتوراعاسىنىڭ ءبىرىنشى ورىنباسارى باۋىرجان بايبەك تۇركىستان وبلىسىنا جۇمىس ساپارى بارىسىندا وڭىردە پارتيانىڭ سايلاۋالدى باعدارلاماسىنىڭ ورىندالۋ بارىسىمەن تانىسىپ، ءبىرقاتار الەۋمەتتىك، مادەني نىسانداردا بولدى. سونداي-اق، تۇركىستان مۋزىكالىق دراما تەاترىنا بارىپ، بەلگىلى جازۋشى، دراماتۋرگ دۋلات يسابەكوۆتىڭ پەساسىنا قويىلعان «بورتە» سپەكتاكلىن تاماشالادى.

«ەلباسى نۇرسۇلتان نازاربايەۆتىڭ بىرنەشە جىل بۇرىن تۇركىستاندى جاڭعىرتۋ تۋرالى قابىلداعان تاريحي شەشىمى كيەلى قالانىڭ وركەندەۋىنە زور سەرپىن بەرگەن ەرەكشە ماڭىزدى وقيعا بولدى. تۇگەل تۇركى ءتاۋ ەتەر كونە قالا جاڭا مارتەبەگە يە بولعاننان كەيىن قۇرىلىس قارقىندى ءجۇرىپ، قىسقا ۋاقىتتا شاھار كەلبەتى قايتا تۇلەدى. ءزاۋلىم عيماراتتار مەن زاماناۋي الەۋمەتتىك-مادەني نىساندار بوي كوتەردى.

سولاردىڭ ءبىرى – قاسيەتتى قالادا ەلباسىنىڭ قولداۋىمەن سالىنىپ، پايدالانۋعا بەرىلگەن تۇركىستان مۋزىكالىق دراما تەاترى. بۇل مادەني نىساننىڭ اشىلۋ راسىمىنە تۇڭعىش پرەزيدەنتتىڭ ءوزى ارنايى قاتىسىپ، تەاتر ۇجىمىمەن كەزدەسكەن بولاتىن.

وڭتۇستىك وڭىرگە جۇمىس ساپارى بارىسىندا وسىناۋ ونەر ورداسىنا بارىپ، تەاتر شىمىلدىعىن تۇڭعىش اشىپ وتىرعان بەلگىلى جازۋشى، دراماتۋرگ دۋلات يسابەكوۆتىڭ پەساسىنا قويىلعان «بورتە» سپەكتاكلىن تاماشالادىم. كورەرمەندەر قاتارىندا رەسپۋبليكامىزدىڭ بەلگىلى زيالىلارى، مادەنيەت سالاسىنىڭ وكىلدەرى، سونداي-اق ءوڭىردىڭ كاسىپكەر مەسەناتتارى تۇگەلدەي دەرلىك بولدى.

قويىلىمعا ارقاۋ بولىپ وتىرعان بورتە – الەم تاريحىنداعى بىرەگەي تۇلعا، دۇنيەنى ءدۇر سىلكىندىرگەن ۇلى قولباسشى شىڭعىسحاننىڭ جان جارى. قازاق حاندىعىن ايگىلى التىن وردانىڭ ءىزىن باسقان مۇراگەرى ساناساق، ونىڭ نەگىزىن قالاعان جوشى حاننىڭ اناسى – وسى بورتە حانىم. وسىناۋ عاجايىپ تۇلعانىڭ ءومىرىن وزەك ەتكەن بۇل قويىلىم تاريحي استارى تەرەڭ، تاربيەلىك ءمانى زور تۋىندى رەتىندە كورەرمەندەردىڭ كوڭىلىنەن شىعىپ، ءورىستى بولاتىنىنا سەنىمدىمىن.

كەز كەلگەن قالانىڭ ءمانى مەن مازمۇنىن ارتتىراتىن، ينتەللەكتۋالدىق دەڭگەيىن وسىرەتىن سالا – مادەنيەت، ءبىلىم وشاقتارى مەن كورنەكتى ورىندار. وسىعان وراي «Nur Otan» پارتياسىنىڭ تۇركىستان قالاسى بويىنشا سايلاۋالدى باعدارلاماسىندا تۋريستىك نىساندار مەن كيەلى ورىنداردى دامىتۋ، كۇلتوبە قالاشىعىن قالپىنا كەلتىرۋ، كورنەكتى تۇلعالارى مەن تاريحي مۇرالارىن تانىمال ەتۋ سەكىلدى كوپتەگەن جوبالاردى ىسكە اسىرۋعا ىقپال ەتۋ كوزدەلگەن. قازىرگى تاڭدا تۇركىستان مۋزىكالىق دراما تەاترى، «ۇلى دالا» ورتالىعى، «Farab» كىتاپحاناسى، ەتنواۋىل، «كەرۋەن-ساراي» تۋريستىك كەشەنى جانە ت.ب. ىسكە قوسىلعان.

قاشاندا «Nur Otan» يگى ىستەردىڭ باسىنان تابىلىپ، ەلگە قاجەتتى باستامالاردى تىنىمسىز اتقارا بەرمەك»، – دەپ جازدى باۋىرجان بايبەك Instagram-داعى پاراقشاسىندا.