بۇگىن «Nur Otan» پارتياسى شىمكەنت قالالىق فيليالىنىڭ ءتوراعاسى، قالا اكىمى مۇرات دۇيسەنبەك ۇلى ايتەنوۆتىڭ توراعالىعىمەن 2025 جىلعا دەيىنگى «وزگەرىستەر جولى: ءار ازاماتقا لايىقتى ءومىر!» سايلاۋ الدى باعدارلاماسىن جۇزەگە اسىرۋ ءۇشىن بەكىتىلگەن جول كارتاسىنىڭ ورىندالۋى بويىنشا بيۋرو وتىرىسى ءوتتى.
وتىرىستىڭ كۇن تارتىبىندە «Nur Otan» پارتياسى دەپۋتاتتىق فراكسياسىنىڭ كەزەكتى ماجىلىسىندە بيۋرو وتىرىسىندا قاراۋ ۇسىنىلعان جول كارتاسىن جۇزەگە اسىرۋدا ورىندالماۋ ءقاۋپى بار تارماقتار قارالىپ، ول بويىنشا جاۋاپتى باسقارما باسشىلارىنىڭ باياندامالارى تىڭدالدى.
ەڭ الدىمەن، 68 تارماق بويىنشا شىمكەنت قالالىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى بەرەكە دۇيسەبەكوۆ ەسەپ بەرىپ، باسقارماعا قاتىستى 18 ءىس-شارانىڭ 4- تارماعى تولىق ورىندالعانىن جانە 12-تارماقتا كورسەتىلگەن جۇمىستار جىل سوڭىنا دەيىن تولىق اياقتالاتىنىن، سوڭعى 2-تارماق كەلەر جىلدىڭ ەنشىسىندە جۇزەگە اسىرىلاتىنىن باياندادى.
سونداي-اق، شىمكەنت قالالىق اۋىل شارۋاشىلىعى جانە ۆەتەريناريا باسقارماسىنىڭ باسشىسى اسقار قانىبەكوۆ جول كارتاسىنىڭ 70-تارماعى بويىنشا 136 گەكتار قۇرايتىن «اگرويندۋستريالدى ايماق» قۇرۋ جانە 71-تارماق بويىنشا 89 گەكتار اۋماققا جىل سايىن 15-20 گا جىلىجاي سالۋدىڭ ورىندالۋ بارىسىن ورتاعا سالىپ، ينۆەستورلارعا مەملەكەت تاراپىنان قولداۋ كورسەتىلمەسە جىلىجاي كەشەندەرىن سالۋ جوبالارى ىسكە اسىرىلماي قالۋ ءقاۋپى باسىم ەكەندىگىن جەتكىزدى.
بۇعان قوسا، 102 جانە 104-تارماقتاردىڭ ىسكە اسىرىلۋى بويىنشا شىمكەنت قالاسىنىڭ جايلى ورتانى دامىتۋ باسقارماسىنىڭ باسشىسى عالىمجان يلياسوۆ بايانداما جاساپ، بۇگىنگى كۇنى قالانىڭ ەكولوگيالىق احۋالىن جاقسارتۋعا باعىتتالعان تارماقتاردىڭ جۇزەگە اسىرىلۋ بارىسىن جەتكىزدى.
بيۋرو وتىرىسىندا باياندالعان تارماقتاردىڭ ورىندالۋى بويىنشا ۇسىنىس-پىكىرلەر ءبىلدىرىلىپ، ساپالى ىسكە اسىرىلۋى تالقىلاندى.
«Nur Otan» پارتياسى شىمكەنت قالالىق فيليالىنىڭ ءتوراعاسى، مۇرات دۇيسەنبەك ۇلى وتىرىس سوڭىندا قالالىق پارتيا فيليالى مەن جاۋاپتى باسقارما باسشىلارىنا جول كارتاسىندا كورسەتىلگەن ينديكاتورلاردىڭ مەرزىمىندە جانە ساپالى ورىنداۋدى ۇيىمداستىرۋدى، ورىندالماي قالۋ ءقاۋپى بار 9 ءىس-شارانىڭ جۇمىسىن جانە نىساندارعا بولىنگەن قاراجاتتىڭ ماقساتتى جۇمسالۋىن قاتاڭ باقىلاۋعا الۋدى تاپسىرىپ، كۇن تارتىبىندە قارالعان ماسەلەلەر بويىنشا قاۋلى قابىلدادى.
پىكىر قالدىرۋ