بۇگىن «Nur Otan» پارتياسى شىمكەنت قالالىق فيليالى جانىنداعى ۇلت دەنساۋلىعى ماسەلەلەرى جونىندەگى كەڭەس وتىرىسى ءوتتى. جيىندى «Nur Otan» پارتياسى شىمكەنت قالالىق فيليالى ءتوراعاسىنىڭ ورىنباسارى قالمۇراتوۆ ءمۇراتالى جۇرگىزدى.

كۇن تارتىبىندە دەنساۋلىق ساقتاۋ سالاسىندا «Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» اتتى سايلاۋالدى باعدارلاماسىن ىسكە اسىرۋ جونىندەگى جول كارتاسىنىڭ اعىمداعى جىلدىڭ 8-ايىندا ورىندالۋى جانە قوعامدىق كەڭەستىڭ الدىڭعى وتىرىسىنداعى ۇسىنىستاردىڭ ورىندالۋى، جول كارتاسىندا بەلگىلەنگەن «مەتاللۋرگ» ستاديونىن جانە مەتاللۋرگتەر پاركىن قايتا قۇرۋ جۇمىستارىنىڭ بارىسى ماسەلەلەرى بولدى.

العاشقى ماسەلە بويىنشا پارتيا جانىنداعى ۇلت دەنساۋلىعى ماسەلەلەرى جونىندەگى كەڭەستىڭ ءتوراعاسى ەسەنبەك سەركەبايەۆتىڭ بايانداماسى تىڭدالدى.

ەسەپتى مەرزىم ىشىندە قوعامدىق كەڭەس اعىمداعى جىلدىڭ مامىر ايىندا قالاداعى №1 قالالىق ەمحانا، «انا مەن بالا» وڭالتۋ ورتالىعى، №2 قالالىق اۋرۋحاناسى مەن قالالىق پەرزەنتحانا ورتالىقتارىندا كوشپەلى ءىس-شارا وتكىزىپ، بىرنەشە كەمشىلىكتەردى انىقتاعان. كوشپەلى ءىس-شارا كەزىندە قوعامدىق كەڭەس تاراپىنان ەكپە سالۋ ۋچاسكەلەرىنە بەينەباقىلاۋ كامەرالارىن ورناتۋ جونىندە ۇسىنىستار ايتىلعان. ناتيجەسىندە، اتالعان مەديسينالىق نىسانداردىڭ ەكەۋىندە ورىن العان كەمشىلىكتەر تولىعىمەن جويىلعان. ال، ەكپە ەگۋ ۋچاسكەلەرىنە بەينەباقىلاۋ كامەرالارىن ورناتۋ تۋرالى ۇسىنىس بويىنشا شىلدەدە رەسپۋبليكادا العاش بولىپ شىمكەنتتەگى ەكپە ەگۋ بەكەتتەرىنە بەينەباقىلاۋ كامەرالارى ورناتىلعان.

كۇن تارتىبىندەگى كەزەكتى ماسەلە بويىنشا شىمكەنت قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەرمەك دارمەنوۆ ءسوز الدى. ول «مەتاللۋرگ» ستاديونىن پيادالانۋعا بەرۋ 2022 جىلعا جوسپارلانعانىن، قازىرگى تاڭدا نىسانداعى قۇرىلىس جۇمىستارى بەلگىلەنگەن كەستەگە سايكەس جۇرگىزىلىپ، ءتيىستى جۇمىستار 70 %-عا ورىندالعانىن اتاپ ءوتتى.