قازاقستاندا توعىز بانك تاراتىلۋ پروسەسىندە تۇر، دەپ حابارلادى قارجى نارىعىن رەتتەۋ جانە دامىتۋ اگەنتتىگى.
اگەنتتىك ليسەنزيالارى كەرى قايتارىپ الىنعان بانكتەردى تاراتۋ ءوندىرىسىنىڭ ءتارتىبى، پروسەسى تۋرالى مالىمەت تاراتتى.
"قازىرگى ۋاقىتتا 9 بانك – ۆاليۋت-ترانزيت بانك، قازينۆەستبانك، Delta Bank، ەكسيمبانك قازاقستان، استانا بانكى، Qazaq Banki، Tengri Bank، AsiaCredit Bank جانە Capital Bank Kazakhstan تاراتىلۋ ساتىسىندا" دەلىنگەن حابارلامادا.
بانك قىزمەتىن توقتاتۋ كەزىندەگى نەگىزگى ماقسات – كرەديتورلاردىڭ تالاپتارىن قاناعاتتاندىرۋ، ولارمەن ەسەپ ايىرىسۋدى قامتاماسىز ەتۋ جانە بانكتىڭ بارلىق وپەراسياسىن اياقتاۋ ەكەنى اتاپ وتىلگەن.
بانك كرەديتورلارىنىڭ تالاپتارى بانكتەر تۋرالى زاڭدا بەلگىلەنگەن كەزەكپەن قاناعاتتاندىرىلادى:
- ءبىرىنشى كەزەكتە، ەڭبەكاقى تولەۋ مەن جەكە تۇلعالار بويىنشا تالاپتار قاناعاتتاندىرىلادى.
- ەكىنشى كەزەكتە، جەكە تۇلعالاردىڭ دەپوزيتتەرى بويىنشا كەپىلدىك بەرىلگەن سوما شەگىندە "قازاقستاننىڭ دەپوزيتتەرگە كەپىلدىك بەرۋ قورى" اق الدىندا ەسەپ ايىرىسۋ.
- ءۇشىنشى كەزەكتە، بانك مۇلكىنىڭ كەپىلىمەن قامتاماسىز ەتىلگەن مىندەتتەمەلەر بويىنشا ەسەپ ايىرىسۋ.
- ءتورتىنشى كەزەكتە، ۇلەستەس تۇلعالار بولىپ تابىلمايتىن جەكە تۇلعالاردىڭ قدكق كەپىلدىك بەرىلگەن سوماسىنان اساتىن دەپوزيتتەرى بويىنشا، سونداي-اق زەينەتاقى اكتيۆتەرىنىڭ ەسەبىنەن جۇزەگە اسىرىلعان دەپوزيتتەر بويىنشا جانە "ءومىردى ساقتاندىرۋ" سالاسى بويىنشا جۇزەگە اسىرىلعان ساقتاندىرۋ ۇيىمدارىنىڭ دەپوزيتتەرى بويىنشا ەسەپ ايىرىسۋى.
- بەسىنشى كەزەكتە، كوممەرسيالىق ەمەس ۇيىمداردىڭ جەكەلەگەن ساناتتار (قايىرىمدىلىق ۇيىمدارى، سوعىس ارداگەرلەرى، مۇگەدەكتەر قوعامدارى) الدىندا ەسەپ ايىرىسۋى.
- التىنشى كەزەكتە، ۇلەستەس ەمەس زاڭدى تۇلعالاردىڭ دەپوزيتتەرى بويىنشا ەسەپ ايىرىسۋ.
- جەتىنشى كەزەكتە، سالىقتار، الىمدار جانە بيۋدجەتكە تولەنەتىن باسقا دا مىندەتتى تولەمدەر بويىنشا ەسەپ ايىرىسۋ، رەسپۋبليكالىق بيۋدجەت قاراجاتى جانە ۇلتتىق قوردىڭ قاراجاتى ەسەبىنەن بەرىلگەن قارىزدار.
- سەگىزىنشى كەزەكتە، قالعان كەزەكتەرگە كىرمەگەن باسقا كرەديتورلار الدىندا ەسەپ ايىرىسۋ.
- توعىزىنشى كەزەكتە، ۇلەستەس جەكە جانە زاڭدى تۇلعالاردىڭ دەپوزيتتەرى بويىنشا ەسەپ ايىرىسۋ.
- ونىنشى كەزەكتە، رەتتەلگەن بورىش جانە مەرزىمسىز قارجى قۇرالدارى بويىنشا ەسەپ ايىرىسۋ.
تاراتۋ ءوندىرىسىن جەدەل اياقتاۋ جانە كرەديتورلاردىڭ تالاپتارىن وتەۋ ماقساتىندا اگەنتتىك بانكتىڭ تاراتۋ كوميسسياسىن تاعايىندايدى.
تاراتۋ كوميسسياسى تاراتىلاتىن بانكتىڭ اتىنان ارەكەت ەتەدى جانە ءوز قۇزىرەتىنە كىرەتىن ماسەلەلەر بويىنشا دەربەس شەشىم قابىلداي الادى: كرەديتورلار رەەسترىن قالىپتاستىرۋ، مۇلىكتى ساتۋ بويىنشا ساۋدا-ساتتىقتى ۇيىمداستىرۋ، بەرەشەكتى سوت تارتىبىمەن ءوندىرىپ الۋ.
تاراتىلاتىن بانكتىڭ ۇيلەرى مەن عيماراتتارى، وزگە جىلجىمايتىن مۇلىك وبەكتىلەرى، كولىكتەرى قۇنىنا قاراماستان، سونداي-اق تاراتىلاتىن بانك مۇلكى بىرەۋىنىڭ باعالاۋ قۇنى 100 اەك-تەن اساتىن وزگە مۇلكى جاريا ساۋدا-ساتتىق (اۋكسيون) ارقىلى عانا ساتىلادى.
بانكتەردىڭ مۇلكىن ساتۋ تۋرالى اقپارات تاراتىلاتىن بانكتىڭ سايتىندا جاريالانادى.
پىكىر قالدىرۋ