"جوعارى وقۋ ورنىنىڭ ۇزدىك وقىتۋشىسى – 2021" رەسپۋبليكالىق بايقاۋىنىڭ جەڭىمپازى 6 ميلليون تەڭگە شاماسىندا سىياقى الادى، دەپ حابارلادى ءبىلىم جانە عىلىم مينيسترلىگى. 

بايقاۋعا قاتىسۋ ءۇشىن قۇجاتتاردى قابىلداۋ 1 قاراشادان 15 قاراشاعا دەيىن جالعاسادى. وعان وقۋ ورىندارىنىڭ تەك شتاتتاعى وقىتۋشىلارى قاتىسا الادى. ولاردىڭ ۇزدىكسىز عىلىمي-پەداگوگيكالىق ءوتىلى كەمىندە 5 جىل بولىپ، وقىتۋشىلىق جانە عىلىمي قىزمەتتە جوعارى جەتىستىكتەرى بولۋى ءتيىس.

– كونكۋرس 2 كەزەڭنەن تۇرادى. الدىمەن جوعارى وقۋ ورنىنىڭ ىشىندە، كەيىن رەسپۋبليكالىق دەڭگەيدە وتەدى. 1جوعارى وقۋ ورنىنىڭ ۇزدىك وقىتۋشىسى1 بايقاۋىنا قاتىسۋ ءۇشىن وتىنىمدەر مەن قۇجاتتار ءبىلىم جانە عىلىم مينيسترلىگىنىڭ universitycontest.iac.kz اقپاراتتىق جۇيەسى ارقىلى ەلەكتروندىق فورماتتا قابىلدانادى.

جوعارى وقۋ ورىندارىنىڭ قىزمەتكەرلەرى مەن پروفەسسورلىق-وقىتۋشىلار قۇرامىنان تۇراتىن ساراپشىلار توبى كەلىپ تۇسكەن بارلىق قۇجاتتى تەكسەرەدى. ساراپتاۋ توبىنىڭ قورىتىندىسى نەگىزىندە جوو كوميسسياسى كونكۋرسقا قاتىسۋشىلاردىڭ ەكىنشى رەسپۋبليكالىق كەزەڭگە قاتىسۋى تۋرالى شەشىم شىعارادى. رەسپۋبليكالىق دەڭگەيدە قۇرىلعان كوميسسيا قۇرامىنا ۇەۇ، ب ا ق، ستۋدەنتتىك جانە جاستار ۇيىمدارىنىڭ، جوو قاۋىمداستىقتارىنىڭ وكىلدەرى مەن ساراپشىلار ەنگىزىلدى، – دەدى ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.

"جوعارى وقۋ ورنىنىڭ ۇزدىك وقىتۋشىسى" بايقاۋىنىڭ جەڭىمپازدارى اقشالاي ىنتالاندىرۋمەن قاتار توسبەلگىگە دە يە بولادى. بايقاۋ اقپاراتتىق جۇيە بازاسىندا وتەدى، كونكۋرسقا قاتىسۋشىلار بارلىق كەزەڭنىڭ اشىق ءوتۋىن باقىلاي الادى.