شىمكەنت قالاسىنىڭ اكىمى مۇرات ايتەنوۆ «Ońtústik» تەلەارناسىنىڭ «اكىم ساعاتى» باعدارلاماسىندا قالاداعى اتقارىلعان جۇمىستار جونىندە بايانداپ، تۇرعىندارمەن تىكەلەي بايلانىسقا شىقتى. وندا، وتكەن جىلى اشىقتىقتى قامتاماسىز ەتۋ، قوعامدىق كولىكتەردىڭ قىزمەتىن جاقسارتۋ، قىزمەت ساپاسىن كوتەرۋ ماقساتىندا ىسكە قوسىلعان ەلەكتروندى تولەم جۇيەسىنە توقتالدى.

قوعامدىق كولىكتەر «تولەم» ەلەكتروندى جۇيەسىنە وتكەن جىلدىڭ 15 قازانىنان باستاپ كوشكەن-دى. بۇگىنگى كۇنگە دەيىن 370 786 تولەم كارتاسى الىنعان بولسا، 85 پايىزدان استام ترانزاكسيا ەلەكتروندى كارتامەن جاسالدى.

370 786 كارتانىڭ 106 100 - وقۋشىلار كارتاسى، 30 686 - ستۋدەنتتىك، 234 مىڭى ستاندارتتى كارتا. ءقازىر كۇنىنە ورتاشا ەسەپپەن «تولەم» جۇيەسىنىڭ نەگىزىندە اۆتوبۋس جولاۋشىلارىنىڭ ترانزاكسياسى 280 مىڭعا جەتتى.

«تولەم» فرونت-وفيسىندە جوعالعان كارتانى قايتا شىعارۋعا ءوتىنىم بەرگەندە جاڭا كارتانى العانعا دەيىن تۇرعىندارعا قولايسىزدىق تۋدىرماۋ ءۇشىن ۋاقىتشا انىقتاما بەرىلەتىن بولدى. وسى انىقتاما بويىنشا وقۋشى 35/50 تەڭگە ءتاريفى بويىنشا جۇرە الادى. كارتالار الماتىدا جاسالاتىن بولعاندىقتان، 10-15 كۇن ىشىندە دايىن بولادى. فرونت-وفيس ءال-فارابي №9 جاستار رەسۋرستىق ورتالىعىندا ورنالاسقان.

سونداي-اق، شاھار باسشىسى تۇرعىندارعا ساپالى ءارى تۇراقتى قىزمەت كورسەتۋدى جۇيەلەندىرۋ ماقساتىندا اۆتوبۋستاردى ونلاين رەجيمىندە كورۋگە ارنالعان «I-kolik» موبيلدىك قوسىمشاسى پايدالانۋعا بەرىلگەنىن جەتكىزدى. قازىرگى ۋاقىتتا 82000 ادام اتالمىش باعدارلامانى قولدانۋدا. باعدارلاما قالا مارشرۋتتارىنىڭ gps ترەكەرلەر ارقىلى ورنالاسقان جەرىن كورسەتەدى. ءموبيلدى قوسىمشانى «app store» جانە «play ماركەت»-تەن تەگىن جۇكتەپ الۋعا بولادى.

تولەم جۇيەسى، قوعامدىق كولىك قىزمەتىندە، ءار باعىتتىڭ جاعدايىن ايقىنداۋعا، تولىمدىلىعىن بىلۋگە سەپتىگىن تيگىزسە، سۋبسيديالاۋ ايماعىن ناقتىلاۋدا ماڭىزدى قۇرالعا اينالدى.