مەملەكەت باسشىسى قاسىم-جومارت توقايەۆ ەلىمىزدە وتباسى تابىسىنىڭ ءتۇرلى دەڭگەيلەرىنە سايكەس كەلەتىن ءبىرىڭعاي تۇرعىن ءۇي ساياساتىن ازىرلەۋدى تاپسىردى. ياعني، پرەزيدەنت كەزەكتە تۇرعان از قامتىلعان كوپ بالالى وتباسىلارعا باسپانا بەرۋ ماسەلەسىن شەشۋدى، ال باسپانا ساتىپ الۋعا جاعدايى جوق ازاماتتارعا الەۋمەتتىك جالعا الۋ تارتىبىمەن قونىستانۋ ءۇشىن مۇمكىندىك بەرۋ كەرەكتىگىن ايتقان بولاتىن.

بۇل باعىتتا شىمكەنت قالاسىندا جۇيەلى جۇمىستار اتقارىلىپ، جىل باسىنان بەرى ءتۇرلى مەملەكەتتىك تۇرعىن ءۇي باعدارلامالارى اياسىندا 3 مىڭعا جۋىق وتباسى باسپانامەن قامتىلعان. بۇل جونىندە 9 ايدىڭ قورىتىندىسى بويىنشا قالا اكىمىمنە ەسەپ بەرگەن قالالىق تۇرعىن ءۇي باسقارماسىنىڭ باسشىسى ا.رىسجانوۆ مالىمدەدى.

ونىڭ ايتۋىنشا، جىل سايىن كەزەكتە تۇرعان ازاماتتارعا پاتەرلەر بەلگىلەنگەن تارتىپپەن ۇلەستىرىلىپ كەلەدى. وسى جىلدىڭ باسىنان تۇرعىن ءۇي كەزەگىندە تۇرعان 682 وتباسى ارەندالىق پاتەرمەن قامتىلعان بولسا، جىل سوڭىنا دەيىن وسى باعىتتا 294 وتباسىعا باسپانا بەرىلەدى.

سونىمەن قاتار، جىل باسىنان «وتباسى بانك» ارقىلى «5-20-25»باعىتى بويىنشا كرەديتتىك تۇرعىن ۇيمەن 730 ازامات قامتىلعان. ونىڭ ىشىندە 261 ازامات تۇرعىن ءۇي كەزەگىندە تىركەلگەندەر.

ال، «7-20-25» باعدارلاماسى بويىنشا شىمكەنت قالاسىنداعى ەكىنشى دەڭگەيلى بانكتەر ارقىلى جىل باسىنان بەرى 1362 ازامات العاشقى تۇرعىن ءۇيدى نارىقتان نەسيە راسىمدەپ ساتىپ العان. جىل سوڭىنا دەيىن كرەديتتىك تۇرعىن ۇيمەن 4 413 وتباسىنى قامتۋ جوسپارلانۋدا.

بۇدان بولەك، «2-10-20 باقىتتى وتباسى» باعدارلاماسى بويىنشا 158 وتباسى نەسيە نەگىزىندە تۇرعىن جايمەن قامتىلىپ، ونىڭ ىشىندە 73 وتباسىعا العاشقى جارناسىنىڭ ءبىر بولىگىن جابۋعا تۇرعىن ءۇي سەرتيفيكاتى بەرىلدى. بۇل جۇمىستار جالعاسىن تابۋدا.

كرەديتتىك تۇرعىن ۇيلەردىڭ قولجەتىمدىلىگىن ارتتىرۋ جانە تابىسى جەتپەيتىن ازاماتتاردى ىنتالاندىرۋ ماقساتىندا جەرگىلىكتى بيۋدجەت ەسەبىنەن اعىمداعى جىلعا 500 ملن. تەڭگەگە تۇرعىن ءۇي سەرتيفيكاتتارىن الەۋمەتتىك كومەك رەتىندە قايتارىمسىز نەگىزدە بەرۋ قاراستىرىلعان. بۇل قىزمەت بويىنشا 902 ءوتىنىم قابىلدانسا، ونىڭ ىشىندە 311 ءوتىنىم – 274 ملن.تەڭگەگە ماقۇلدانعان.