شىمكەنتتە كوز اۋرۋلارى بار ناۋقاستاردى قابىلدايتىن كلينيكا اشىلدى. 1934 جىلدان بەرى قىزمەت اتقارىپ كەلە جاتقان الماتى كوز اۋرۋلارى قازاق عىلىمي-زەرتتەۋ ينستيتۋتى قالامىزدا كلينيكاسىن اشتى. قازاقستاننىڭ وڭتۇستىك ءوڭىرى بولىمشەسى ساناتىنداعى بۇل كلينيكا وزىق مەديسينالىق جابدىقتارمەن قامتىلعان.

زاماناۋي ۇلگىدەگى جاڭا مەديسينالىق ورتالىقتىڭ اشىلۋ راسىمىنە پارلامەنت ءماجىلىسىنىڭ دەپۋتاتتارى، دەنساۋلىق ساقتاۋ مينيسترلىگىنىڭ وكىلدەرى جانە شىمكەنت قالاسىنىڭ اكىمى قاتىستى.

اشىلۋ راسىمىندە ءسوز العان قالا باسشىسى مۇرات ايتەنوۆ كلينيكانىڭ اشىلۋى ارقىلى تۇرعىنداردىڭ ساپالى مەديسينالىق كومەككە، بىلىكتى دارىگەرلەردەن كەڭەس الۋعا قولجەتىمدىلىگى ارتقانىن اتاپ ءوتتى.
«بۇل كلينيكا شىمكەنت قالاسىمەن بىرگە جامبىل، قىزىلوردا، تۇركىستان وبلىستارىنىڭ تۇرعىندارىنا قىزمەت كورسەتەدى. كۇردەلى وتا جاساتۋ ءۇشىن تۇرعىندار بۇرىن نۇر-سۇلتان، الماتى قالالارىنا بارسا، ەندى مۇنداي كۇردەلى وتالار قالامىزدا جاسالادى.

مەديسينالىق كومەك ساپاسىن ارتتىرۋ – مەملەكەتتىك ساياساتتىڭ باسىم باعىتى. بيىلعى جىلى قالامىزدا 5 مەديسينا ورتالىعى اشىلدى. سوڭعى 2 جىلدا مەديسينا ۇيىمدارىنىڭ ماتەريالدىق-تەحنيكالىق بازاسىن جاڭارتۋعا 12،9 ملرد. تەڭگە باعىتتالدى. جاڭارۋ كورسەتكىشى 81 پايىزعا جەتەدى. الداعى 5 جىلدا 1 مىڭ ورىندىق اۋرۋحانا، 10 ەمحانا، 12 دارىگەرلىك امبۋلاتوريا سالىنادى. جىل سايىن 300 دارىگەر شەت ەلدەرگە بىلىكتىلىگىن ارتتىرۋعا جىبەرىلەدى»، - دەدى م.ايتەنوۆ.

شىمكەنت قالاسىندا اشىلعان كلينيكا تۇتاس وڭتۇستىك ءوڭىرىنىڭ تۇرعىندارىنا قىزمەت كورسەتەتىن بولادى. مۇندا كۇندىزگى جانە تاۋلىك بويى ستانسيونارلار اشىلىپ، 38 توسەك ورنى دايىندالعان. كلينيكادا كونسۋلتاتيۆتى-دياگنوستيكالىق، لازەرلىك ەم بولىمشەلەرى اشىلعان.

كلينيكا ادام ورگانيزمىنىڭ كورۋ قابىلەتىمەن بايلانىستى 15 اۋرۋ تۇرلەرى بويىنشا نوزولوگيالىق قىزمەت كورسەتىپ، ەم شارالارىن جۇرگىزەدى. جوعارى مەديسينالىق تەحنولوگيالاردىڭ كومەگىمەن 9 وتا تۇرلەرى جاسالىپ، ناۋقاستاردىڭ تولىق قالپىنا كەلۋلەرىنە دەيىن دارىگەرلىك كۇتىمگە الىنادى. كلينيكاداعى العاشقى وتا بۇگىن جاسالادى، وعان دارىگەرلەر ۇجىمى تولىق دايىن.

ورتالىقتا 81 ادام جۇمىسپەن قامتىلدى. ونىڭ ىشىندە 21 ادام تاجىريبەلى دارىگەرلەر بولسا، ورتا بۋىن مەديسينا قىزمەتكەرلەرىنىڭ سانى 30 ادام. قالعاندارى كومەكشى پەرسونالدى قۇرايدى.