شىمكەنت قالاسىندا كوروناۆيرۋس ينفەكسياسى مەن پنيەۆمونياعا شالدىققان ناۋقاستاردى ەمدەگەن «اتامەكەن» ورتالىعىنىڭ ماماندارى وڭالتۋ ەمىن قايتا جالعاستىرماق.
ورتالىقتا بيىل قاراشا ايىنان باستاپ ءتۇرلى جاراقات العان جانە دەرتى اسقىنعان ناۋقاستارعا رەابيليتاسيالىق كومەك كورسەتىلەدى. وڭالتۋ ەمى ناۋقاستارعا تەگىن جۇرگىزىلەدى. ول ءۇشىن پاسيەنت تىركەلگەن مەكەنجايى بويىنشا ەمحانادان جولداما ارقىلى كەلەدى.
ناقتىراق ايتقاندا، «اتامەكەن» رەابيليتاسيا ورتالىعىندا ينسۋلت، تراۆماتولوگيالىق وتالاردان كەيىنگى، COVID-19 پنيەۆمونيادان كەيىنگى ەرتە رەابيليتاسيا تاۋلىك بويى ستاسيونارلى دەڭگەيدە تەگىن جۇرگىزىلەدى.
«اتامەكەن» رەابيليتاسيا ورتالىعىنا كەلگەن ءاربىر ناۋقاسپەن ارنايى بىلىكتى ماماندار توبى جۇمىس ىستەيدى. پاسيەنتتىڭ جاعدايىن جەكە باعالاپ، ەم-شارا تاعايىندايدى. ورتالىقتا فيزيو ەم، يگلوتەراپيا، ماسساجدىڭ تۇرلەرى، لوگوپەديالىق ماسساج جانە ەمدىك دەنەشىنىقتىرۋ ارنايى ينسترۋكتور مامانىنىڭ باقىلاۋىمەن جۇرگىزىلەدى.
سونداي-اق رەابيليتولوگ، نيەۆروپاتولوگ، تراۆماتولوگ، پۋلمونولوگ، پسيحولوگ، لوگوپەد جانە ت.ب. جەكە بەيىندى ماماندىردىڭ كەڭەسىن تەگىن الۋعا بولادى.
پىكىر قالدىرۋ