قازاقستاندىق ءانشى ديانا شاراپوۆا «ارالدان ۇشقان اققۋلار» ليريكالىق كومپوزيسياسىنا  بەينەبايان ءتۇسىردى. شىعارمانى ق ر مادەنيەت قايراتكەرى س.بايتەرەكوۆ جازعان. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.

بەينەباياننىڭ سيۋجەتى بويىنشا ءانشى قۇرعاعان ارال ءتۇبىن زەرتتەيدى،-دەدى Mironov Entertainment اگەنتتىگى.

ءانشىنىڭ ايتۋىنشا، ارال ماڭى اۋداندارىندا بولعان كۇندەرى ءتۇسىرۋ توبىنا اۋىر تۇسكەن. ويتكەنى ولار ەكولوگيالىق تراگەديانىڭ اۋقىمىن ءوز كوزدەرىمەن كوردى.

بەينەباياننىڭ پروديۋسەرى رومان ميرونوۆ ايتقانداي، نەگاتيۆتى عانا كورسەتپەي، كليپ «ۇمىتپەن» اياقتالادى.  «ويتكەنى قازاقستان بۇۇ مەن دۇنيەجۇزىلىك بانكتىڭ كومەگىمەن ارال تەڭىزىن ساقتاپ قالۋ جانە ايماق تۇرعىندارىنىڭ ءومىرىن جاقسارتۋ ءۇشىن قوماقتى قارجى جۇمساپ جاتىر. 2005 جىلى كوكارال بوگەتى سالىندى. بۇل ەلىمىز بەن حالىقارالىق ۇيىمداردىڭ بىرلەسكەن جەتىستىگى دەپ سانايمىن»، - دەدى پروديۋسەر.

ەسكە سالا كەتەيىك، ارال تەڭىزى ماسەلەسىن ءانشى ديانا شاراپوۆا عانا ەمەس، سونىمەن قاتار الەمدىك جۇلدىزدار دا قوزعادى.  Pink Floyd وتكەن جىلى Louder thanWords كومپوزيسياسىنا قۇرعاعان ارال تۋرالى مۋزىكالىق ۆيدەونى تانىستىردى.  سونىمەن قاتار گولليۆۋد اكتەرى لەوناردو دي كاپريو ءوزىنىڭ Twitter-دەگى پاراقشاسىندا ارال تەڭىزى تراگەدياسى تۋرالى پىكىرىن ايتىپ، ءشول ورتاسىنداعى كەمە قالدىعى كورسەتىلگەن فوتونى جاريالادى.