شىمكەنتتە قولايلى جاعداي جاساۋ ءۇشىن جىل سايىن جاڭا مەكتەپتەر سالىنۋدا. مەملەكەت باسشىسىنىڭ تاپسىرماسىن جۇزەگە اسىرۋ ماقساتىندا «توعىس» تۇرعىن الابىندا №120 مەكتەبىندە قوسىمشا 300 ورىندىق كورپۋس پايدالانۋعا بەرىلدى.

مەكتەپ عيماراتى زاماناۋي وقۋ قۇرالدارىمەن جابدىقتالعان. حيميا، بيولوگيا، فيزيكا، STEM، «ينتەللەكتۋم»، ينكليۋزيانى قولداۋ كابينەتتەرى بار. ينفورماتيكالىق ءبىلىمىن جەتىلدىرەتىن 605 كومپيۋتەر مەن 11 ينتەراكتيۆتى تاقتا ورناتىلعان. وقۋشىلاردىڭ شىنىعۋى ءۇشىن 2 سپورت زال جانە دەنساۋلىعىن قاداعالايتىن مەديسينالىق بەكەت قارالعان.

ءقازىر مەكتەپتە 57 سىنىپ بولمەسىندە 2070 وقۋشى 81 سىنىپقا ءبولىنىپ ءبىلىم الادى. ودان بولەك، 5 مەكتەپ الدى دايارلىق توبىندا 106 ءبۇلدىرشىن ەكى اۋىسىمدا العاشقى ساۋاتىن اشۋدا.

وقۋشىلاردىڭ قاۋىپسىزدىگى دە باستى تالاپتىڭ ءبىرى. وقۋ عيماراتىنا كىرە بەرىستە تۋرنيكەت، دابىل تۇيمەسى قويىلعان. ورناتىلعان 38 بەينەباقىلاۋ كامەرالارى بالالاردىڭ ءقاۋىپسىز بولۋىن قاداعالايدى.