قالا تۇرعىندارى ەندى ارناۋلى مەملەكەتتىك جاردەماقىعا ءوتىنىشتى eGov پورتالىمەن نەمەسە حقو-عا جۇگىنۋ ارقىلى بەرە الادى.

«ازاماتتارعا ارنالعان ۇكىمەت» شىمكەنت قالالىق فيليالىنىڭ وكىلدەرى مەملەكەتتەن بەرىلەتىن بۇل كومەكتىڭ ءتۇرىن 20-عا جۋىق ارنايى ساناتقا جاتاتىن ازاماتتار الالاتىنىن ايتادى.

بۇگىندە اتالعان جاردەماقىنى ۇوس ارداگەرلەرى جانە ولارعا تەڭەستىرىلگەن ازاماتتار، قايتىس بولعان ۇوس مۇگەدەكتەرىنىڭ جەسىرلەرى جانە اۋعانستانداعى نەمەسە سوعىس قيمىلدارى جۇرگiزiلگەن باسقا مەملەكەتتەردەگى سوعىس قيمىلدارى كەزiندە قازا تاپقان اسكەريلەردىڭ وتباسىلارى العان. بۇدان بولەك، قورشاۋدا قالعان لەنينگراد تۇرعىندارى، كامەلەتكە تولماعان بۇرىنعى كونسلاگەر تۇتقىندارى مەن چەرنوبىل اەس-داعى جانە باسقا دا اپاتتىڭ زارداپتارىن جويۋعا
قاتىسۋشىلاردىڭ وتباسىلارى الىپ كەلگەن.

جاردەماقىنى حقو نەمەسە eGov.kz ەلەكتروندىق ۇكىمەت پورتالى ارقىلى الۋعا ءوتىنىش بەرۋ ءۇشىن تومەندەگى قۇجاتتاردى ۇسىنۋ قاجەت:

- بەلگىلەنگەن ۇلگى بويىنشا ءوتىنىش؛
- جەكە باسىن كۋالاندىراتىن قۇجات؛
- بانك شوتى بويىنشا مالىمەتتەر؛
- جاردەماقىنى الۋ قۇقىعىن راستايتىن قۇجات.

ەستەرىڭىزگە سالا كەتەيىك، ەرەكشە قاجەتتىلىكتەرى بار ازاماتتارعا جاردەماقى الۋ ءۇشىن حقو-عا بارۋدىڭ قاجەتى جوق. مۇنداي جاعدايلاردا حقو قىزمەتكەرىن ۇيگە شاقىرۋ قىزمەتى بار. ول ءۇشىن ءبىرىڭعاي بايلانىس ورتالىعىنىڭ 1414 نومىرىنە قوڭىراۋ شالىپ، سۇرانىس قالدىرۋ قاجەت. حقو قىزمەتكەرى ءوتىنىش بەرۋشىمەن بايلانىسادى جانە كليەنتكە بارۋ ءۇشىن قولايلى ۋاقىتىن كەلىسەدى.