بۇگىن - قازاقستاندا رۋحاني كەلىسىم كۇنى. وسى داتالى مەرەكەگە وراي شىمكەنت قالاسى اكىمىنىڭ ءبىرىنشى ورىنباسارى ش.مۇقان ءدىني كونفەسسيالاردىڭ باسشىلارىمەن كەزدەستى.

شارا بارىسىندا تاراپتار ءوزارا پىكىر الماسىپ، ءدىنارالىق قارىم-قاتىناس ماسەلەلەرىن تالقىلادى.

كەزدەسۋدە ءسوز العان قالا باسشىسىنىڭ ءبىرىنشى ورىنباسارى 1992 جىلدان باستاپ بۇل كۇن ەلىمىزدە اتاۋلى كۇن رەتىندە اتالىپ كەلەتىنىنە توقتالىپ، قالاداعى ءدىني كونفەسسيالاردىڭ ءوزارا ىنتىماق-بىرلىگى مەن قوعامداعى ءرولىن ءسوز ەتتى.

باسقوسۋدا قازاقستان مۇسىلماندارى ءدىني باسقارماسىنىڭ شىمكەنت قالاسى بويىنشا وكىل يمامى باقداۋلەت ابدراحمانوۆ، «كازانسكوي يكونى بوجيەي ماتەري» جەرگىلىكتى پراۆوسلاۆيەلىك ءدىني بىرلەستىگى پروتويەرەيىنىڭ كومەكشىسى الەكسەي كوروليەۆسكيي جانە شىمكەنت قالاسىنىڭ «اگاپە» ىنجىلدىك حريستيان شىركەۋىنىڭ پاستورى اندرەي شاتالوۆتار ءسوز سويلەدى.

جيىن سوڭىندا كونفەسسيا وكىلدەرى قالا اكىمىنىڭ ارنايى العىس حاتىمەن ماراپاتتالدى. سونىمەن بىرگە تاۋەلسىزدىكتىڭ 30 جىلدىعى مەن «18 قازان – رۋحاني كەلىسىم كۇنىنە» وراي ءدىني كونفەسسيا وكىلدەرى اراسىندا تاتۋلىق پەن كەلىسىمدى نىعايتۋ، بۇقارالىق سپورتتى ناسيحاتتاۋ، سالاۋاتتى ءومىر سالتىن دارىپتەۋ ماقساتىندا وتكىزىلگەن كىشى فۋتبول جارىسىنىڭ 1 ورىن جۇلدەگەرىنىڭ ءدىني بىرلەستىك جەتەكشىسىنە كۋبوك تابىستالدى.

شىمكەنت قالاسىندا 11 كونفەسسيانى بىلدىرەتىن 118 ءدىني بىرلەستىك تىركەلگەن.