شىمكەنتتە 302 015 ادام ياعني، تۇرعىنداردىڭ 27،5 پايىزى ونلاين ساناقتان وتكەن. بۇگىنگە دەيىن ءداستۇرلى ساناق بارىسىندا 404 666 ازامات تىركەلىپ، جالپى قالادا ۇلتتىق ساناققا قاتىسقان حالىقتىڭ ۇلەسى 64،3 پايىزدى قۇرادى.

ءقازىر قالادا 172 نۇسقاۋشى-باقىلاۋشى جانە 1 207 ينتەرۆيۋەر ۇيلەردى ارالاپ، تىكەلەي حالىق ساناعىن وتكىزۋدە. تۇرعىن ۇيلەرگە بارعان ينتەرۆيۋەرلەردە حالىق ساناعىنىڭ لوگوتيپى بار كۋالىك، سومكە، مويىن وراعىش بولۋى مىندەتتى. ناۋقان بارىسىندا ولار قوعامدىق كولىكتەردە تەگىن ءجۇرۋ مۇمكىندىگى دە قارالعان.

بيىل 15 قازاندا ونلاين-ساناق اياقتالدى. ينتەرنەت جەلىسى ارقىلى جۇرگىزىلگەن ساناق 1 قىركۇيەكتە باستالىپ، 45 كۇنگە جالعاستى. ۇلتتىق ستاتيستيكا بيۋروسىنىڭ شىمكەنت قالاسى بويىنشا دەپارتامەنتىنىڭ مالىمەتىنشە، ونلاين-ساناقتان وتكەندەر سانى بويىنشا قاراتاۋ جانە اباي اۋداندارى جەتەكشى ورىندا.

ناۋقاننىڭ ونلاين تۇرىنەن وتپەگەن ازاماتتار ينتەرۆيۋەرلەردىڭ ساۋالدارىنا جاۋاپ بەرە وتىرىپ،ءداستۇرلى ساناقتان وتەتىن بولادى. ۇلتتىق حالىق ساناعى كەزىندە «1446» ءبىرىڭعاي call-ورتالىعى تاۋلىك بويى جۇمىس جاساۋدا. اقپارات ورتالىعىنا قوڭىراۋ شالۋ تەگىن.

ەل ءۇشىن ايرىقشا ماڭىزدى ناۋقان قورىتىندىسى قالانىڭ ەكونوميكالىق، دەموگرافيالىق جانە الەۋمەتتىك جاعدايدى كورسەتەدى. الىنعان دەرەكتەر بارلىق دەڭگەيدەگى بيۋدجەتتەردىڭ وبەكتيۆتى قالىپتاسۋىنا نەگىز بولماق.