رەسەي پرەزيدەنتى ۆلاديمير ءپۋتيننىڭ سيرياعا اۋە شابۋىلىن جاساۋ تۋرالى شەشىمى ءبىرازدى تاڭقالدىرعان بولاتىن. بۇل تۋرالى «قامشى» پورتالى globalpost.com-عا سىلتەمە جاساي وتىرىپ حابارلايدى. رەسەيلىك باسشىنىڭ شىعىس كورشىسىنە قاتىستى جوسپارى كوپشىلىك ءۇشىن ءالى كۇنگە دەيىن جۇمباق بولىپ وتىر. كرەملدىك ۇكىمەتتىڭ نازارى «يسلامدىق مەملەكەت» ۇيىمىن ەڭسەرۋ ەكەنى سوزبەن ايتىلسا دا، ىسپەن دالەلدەنگەن جوق. رەسەيلىك ۇكىمەتتىڭ نەگىزگى ماقساتى – ISIS-پەن كۇرەس جۇرگىزۋ ەمەس، جازىقسىزدارعا شابۋىل جاساپ، باشارا ال-اسادتىڭ بيلىگىن قولداۋ دەيدى كوپتەگەن سىنشىلار.

رەسەيدىڭ قورعانىس مينيسترلىگى سيرياعا باعىتتالعان اسكەري ۇشاقتارى ماقساتتى قارسىلاستاردى جويعانىن مالىمدەسە، سيريالىق وپپوزيسيالىق توپتار مۇلدەم قاراما-قايشى پىكىردى العا تارتىپ وتىر. ولار رەسەيدىڭ قاراپايىم حالىققا تيگىزگەن زاردابىنا، كىناسىز جانداردىڭ ولىمىنە نارازى ەكەنىن بىلدىرۋدە.

ءبىراق، رەسەي ءىىم-نىڭ باس حاتشىسى ماريا زاحاروۆا باتىستىق جانە وزگە ەلدەردىڭ بۇقارالىق اقپارات قۇرالدارىن سيرياداعى جاعدايعا بايلانىستى حالىقتى دەزينفورماسيالاپ جاتقاندارى ءۇشىن كىنا تاعۋدا.

ەسەسىنە ورىس پراۆوسلاۆيەلىك شىركەۋىنىڭ وكىلى ۆسيەۆولود چاپلين وڭىرلىك باق-قا بەرگەن سۇحباتىندا باتىس ەلدەرى تۋرالى دانەڭە دەگەن جوق، بار بولعانى وتانداستارىنىڭ بۇل قارەكەتىن قولداپ: «تەرروريزمگە قارسى كۇرەس قاسيەتتى سوعىس سانالادى. ءبىزدىڭ مەملەكەتىمىز، وسى رەتتە بەلسەندىلىك تانىتىپ وتىر» دەگەن بولاتىن. بۇل مالىمدەمەسىن وبەكتيۆتىلىككە بالاۋ اعاتتىق بولار، سەبەبى شىركەۋدىڭ كرەملمەن تىعىز بايلانىسى بار، ونىڭ ۇستىنە مۇنداي ساياسي قولداۋ تانىتىپ وتىرعانى ءبىرىنشى رەت ەمەس.

ساياسي ەليتانىڭ باسىم كوپشىلىگى كرەملدىڭ نۇسقاۋىمەن شەشىم قابىلداۋعا داعدىلانعان. بۇل رەسەي ءۇشىن قالىپتى جاعداي. ايتا كەتسەك، شەشەندىك كوشباسشى رامزان كادىروۆ تا وسى جاعدايدىڭ ايقىن دالەلى.

«رەسەيلىك اۋە وپەراسياسىنىڭ جالعىز ورىندالىپ جاتقانى، ارينە، وكىنىشتى. ءبىراق، سيرياداعى ISIS-پەن كۇرەس جۇرگىزىپ جاتقان اسكەرگە جاردەم-كۇش قاجەت بولسا، ءبىز العاشقىلاردىڭ ءبىرى بولىپ كەزەككە تۇرامىز. ءبىزدىڭ اسكەري دايىندىق ءنومىرى ءبىرىنشى دەپ اتالۋعا لايىق»، - دەپ پىكىر ءبىلدىردى، مازاسىز ايماقتىڭ كوشباسشىسى.

اعىمداعى اپتادا جاسالعان ساۋالنامادا رەسەي حالقىنىڭ 2/3 بولىگى سيرياعا اسكەر جىبەرۋگە قارسىلىق بىلدىرگەنى انىقتالدى. حالىقتىڭ كوپشىلىگى 1979 جىلدان باستاۋ العان اۋعان ەلىمەن 10 جىلعا سوزىلعان قاندى شايقاستا 15 مىڭ كەڭەستىك ساربازدان ايىرىلعانىن وكىنىشپەن ەسكە الادى. رەسەيلىكتەر ول سوعىستىڭ كوممۋنيستىك تارتىپكە دەگەن ۇلكەن حالىقتىق اگرەسسيا تۋدىرىپ كەتكەنىمەن ءبولىستى.

پۋتين جانە وزگە دە رەسمي تۇلعالاردىڭ ايتۋىنشا، قۇرلىقتاعى اسكەر سيريالىق جوسپارعا ەنبەيتىنى جونىندە مالىمدەگەن بولاتىن. ءبىراق، ۇكىمەتتىڭ ۋادەسىنە بايلانىستى بۇگىندە كۇمان بىلدىرەتىندەر دە از ەمەس كورىنەدى.

نازگۇل نازار