قازاقستاندا سۇرانىسقا ساي كەلمەيتىن 50 ماماندىق بويىنشا كوللەدجدەردە وقىتۋ توقتاتىلدى. بۇل تۋرالى بءىلىم جانە عىلىم مينيسترلىگى حابارلادى.

بۇگىندە كوللەدجدەردە سىناما ىرىكتەۋشى، شام جاساۋشى، گۋۆەرنەر، زاڭگەر-كونسۋلت جانە تاعى باسقا ماماندىقتار بويىنشا قابىلداۋ توقتاتىلدى. سونداي-اق جىكتەۋشىدەن "ءبىلىم بەرۋ ۇيىمىنىڭ زەرتحاناشىسى"، "پاتەنتتانۋ" جانە باسقا دا ماماندىقتار الىنىپ تاستالدى. 

ءبىلىم جۇيەسىندەگى بۇل جۇمىستار، ەڭبەك نارىعىنداعى سۇرانىستارعا ساي كەلۋى ءۇشىن جاسالعان. ەندىگى كەزەكتە وقۋ پروسەسىنە جاڭا ءبىلىم بەرۋ باعدارلامالارى ەنگىزىلىپ جاتىر.

– ءبىزدىڭ باستى ماقساتىمىز – ءبىلىم بەرۋ باعدارلامالارى مەن وقىتىلاتىن ماماندىقتاردى جۇمىس بەرۋشىلەردىڭ زاماناۋي سۇرانىستارىنا سايكەستەندىرۋ. سوندىقتان ءبىز ۇلكەن تالداۋ جۇمىستارىن جۇرگىزىپ، ەڭبەك نارىعىنا مونيتورينگ جۇرگىزدىك. جۇمىس بەرۋشىلەرمەن جانە سالالىق قاۋىمداستىقتاردىڭ وكىلدەرىمەن كەزدەستىك. ولاردىڭ ۇسىنىستارىن ەسكەرە وتىرىپ، ماماندىقتار جىكتەۋىشىسىن جاڭارتتىق. 

ەندى قازاقستاندىق كوللەدجدەردە "روبوتوتەحنيكا جانە ەندىرىلگەن جۇيەلەر"، "نانوماتەريالدار نەگىزىندەگى بۇيىمدار تەحنولوگياسى"، "ءوندىرىستىڭ ءادديتيۆتى تەحنولوگيالارى"، "قاشىقتان باسقارىلاتىن اۆياسيالىق جۇيە"، "عيماراتتاردى جوبالاۋ مەن پايدالانۋدىڭ اۆتوماتتاندىرىلعان جۇيەلەرى"، "جىلىجاي شارۋاشىلىعىن ۇيىمداستىرۋ"،"گرافيكالىق جانە مۋلتيمەديالىق ديزاين"، "تاس وڭدەۋ ءوندىرىسى"، "لاندشافتىق ديزاين"، "جىلجىمايتىن مۇلىكتى باسقارۋ"، "دەستيناسيانى باسقارۋ"، "قۇرىلىستاعى سمەتالىق ءىس"، "ەڭبەكتى قورعاۋ جانە تەحنولوگيالىق پروسەستەردىڭ قاۋىپسىزدىگى" جانە باسقا دا جاڭا ماماندىقتار وقىتىلادى، – دەدى ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم بەرۋ دەپارتامەنتىنىڭ ديرەكتورى ناسىمجان وسپانوۆا.