پاريجدە جۇما كۇنى ۋكراينا جانە سيريا جاعدايلارىنا قاتىستى نورمان تورتتىگىنىڭ كەزدەسۋى ءوتتى. ۆلاديمير پۋتين، پەتر پوروشەنكو، انگەلا مەركەل جانە فرانسۋا وللاندتىڭ جابىق فورماتتا وتكەن كەلىسسوزدەرى بەس ساعاتقا سوزىلعان بولاتىن. بۇل تۋرالى «قامشى» پورتالى euronews.com-عا سىلتەمە بەرە وتىرىپ حابارلايدى.
بۇل اقپاندا وتكەن مينسك كەلىسىمىنەن كەيىنگى باسشىلاردىڭ العاشقى كەزدەسۋى.
«بەيبىتشىلىككە جەتۋ جولىندا ءاربىر قادام تالقىعا الىنعان ماڭىزدى كەزدەسۋ بولدى. پاريجدەگى بۇل كەلىسىم دە مينسك كەلىسىمى ىسپەتتى سوزدەن ىسكە كىرىسكەندە عانا ناتيجەسىن بەرمەك»، - دەپ وپتيميستىك كوزقاراسىن ءبىلدىردى فرانسۋا وللاند. سونىمەن قاتار، شىعىس ۋكرايناداعى قازانعا جوسپارلانعان سايلاۋدىڭ قايتا ۇيىمداستىرىلىپ، زاڭدارى قايتا بەكىتىلەتىنىن ايتىپ ءوتتى. «بۇعان سەبەپ – سايلاۋ كەلىسىمگە سايكەس ەمەس شارتتارعا نەگىزدەلگەن»، - دەپ تۇسىندىرمە بەردى وللاند مىرزا.
سامميتتەن كەيىن فرانسيا پرەزيدەنتىنىڭ رەسمي ينستاگرام-اككاۋنتىندا نورماندىق فورماتتاعى كەزدەسۋ بارىسى تۋرالى ۆيدەو جاريالانعان بولاتىن. ونداعى رەسەي پرەزيدەنتى ۆلاديمير پۋتين مەن ونىڭ ۋكراينالىق ارىپتەسى پەتر پوروشەنكو ەكەۋى ءبىر-بىرىنىڭ قولىن قىسقان كادر الەۋمەتتىك جەلى قولدانۋشىلارىنىڭ نازارىن بىردەن اۋداردى. بىرەۋلەر مۇنى يگى ءىستىڭ باسماسىنا بالاسا، ەندى بىرەۋلەر جاي عانا ديپلوماتتىق ەتيكانىڭ كورىنىسى عانا دەپ تون ءپىشىپ الەك.
ايتا كەتەيىك، نورمان تورتتىگىنىڭ 11-12 اقپان ارالىعىندا مينسك قالاسىندا وتكەن كەلىسسوزدەرى 16 ساعاتقا سوزىلعان بولاتىن.
