رەسەي بەلارۋستە 10 كۇندىك اسكەري جاتتىعۋلاردى باستايدى. كەيبىر ساراپشىلار مۇنى "ماسكەۋدىڭ ۋكراينا مەن باتىسقا سوعىس ىقتيمالدىعىن ءبىلدىرۋ ءۇشىن جاساعان كۇش كورسەتۋى" ەكەنىن ايتادى. 

رەسەيلىك كۇشتەر مەن تەحنيكا بەلارۋسكە قاڭتاردىڭ ورتاسىندا كەلە باستادى، شامامەن 30 000 اسكەر "وداقتاستاردىڭ شەشىمى" دەپ اتالاتىن جاتتىعۋلارعا قاتىسادى دەپ كۇتىلۋدە.

ناتو مۇنى قىرعي-قاباق سوعىستان بەرگى "اسكەريلەردى بەلارۋس ەلىنە ەڭ ءىرى ورنالاستىرۋ" دەپ اتادى.

وقۋ-جاتتىعۋلاردىڭ "بەلسەندى كەزەڭى" بەيسەنبىدە باستالادى. 

"وداقتاستاردىڭ شەشىمى" كەزىندە ناتو-نىڭ شابۋىلىن يميتاسيالاۋ ءۇشىن اۋە كۇشتەرى مەن قۇرلىق اسكەرلەرىنىڭ كەڭ اۋقىمدى مانيەۆرلەرى بولادى دەپ بولجانۋدا.

اقش پەن ناتو "بۇل جاتتىعۋلار ناقتى شابۋىلعا نەمەسە بەلارۋس شەكاراسىنان وڭتۇستىككە قاراي 150 شاقىرىم جەردە ورنالاسقان كييەۆتى باسىپ الۋعا دايىندىق" دەپ ەسكەرتتى؛ 2014 جىلى قىرىم اننەكسيالانار الدىندا دا رەسەيدىڭ اسكەري جاتتىعۋلارى وتكەن.

ءال-جازيرا تەلەارناسىنا سۇحبات بەرگەن ساراپشىلار جاتتىعۋلار كەزىندە تولىق اۋقىمدى باسىپ كىرۋ نەمەسە شابۋىل جاساۋ ەكىتالاي ەكەنىن ايتتى، ءبىراق شيەلەنىس كەزىندە ەكى جاقتىڭ قاتە قادامى اسكەري ارەكەتكە سوقتىرۋى مۇمكىن ەكەنىن جوققا شىعارمادى.

"اسكەري دايىندىق پولشا مەن ليتۆاعا جانە ۋكراينانىڭ سولتۇستىگىنە ءقاۋىپ توندىرۋگە باعىتتالعان. رەسەي كييەۆتى باسىپ الۋى مۇمكىن وپەراسيانى جۇرگىزۋگە قاۋقارلى" دەدى بۇرىنعى ۋكراين ديپلوماتى جانە قورعانىس ستراتەگيالارى ورتالىعىنىڭ قاۋىپسىزدىك ساياساتى بويىنشا ساراپشىسى الەكساندر حارا.

"Maxar Technologies" كومپانياسى جاساندىسەرىكتەن تۇسىرگەن سۋرەتتەر 4 اقپاندا ۋكراينا شەكاراسىنان شامامەن 50 كم قاشىقتىقتا ورىس اسكەري تەحنيكاسى، زىمىراندار، زىمىران تاسىعىشتار جانە شابۋىلداۋشى ۇشاقتار بار ەكەنىن كورسەتتى.

سەيسەنبى كۇنى ۋكراينا تۇرىك قۇراستىرعان بايراكتار درونىن، سونداي-اق ۇلىبريتانيادان جاقىندا الىنعان تانكىگە قارسى قارۋ-جاراقتاردى سىناۋ ءۇشىن ەلدىڭ تۇكپىر-تۇكپىرىندە ءوز جاتتىعۋلارىن وتكىزەتىنىن حابارلادى.

ماسكەۋ الداعى اپتالاردا وڭتۇستىك ايماقتارىندا اۋقىمدى تانك جاتتىعۋلارىن وتكىزۋ جوسپارىن جاريالادى.

رەسەي مولدوۆانىڭ ماسكەۋشىل سەپاراتيستىك پريدنەستروۆە سياقتى ايماقتاردا شاعىن اسكەري جاتتىعۋلار وتكىزىپ ۇلگەردى.

كرەملدىڭ باسپا ءسوز حاتشىسى سەيسەنبىدە رەسەي وقۋ-جاتتىعۋلار اياقتالعاننان كەيىن بەلارۋستەن اسكەرىن شىعارۋدى جوسپارلاپ وتىرعانىن ايتتى.

الايدا، بەيجىڭ قىسقى وليمپياداسى بىتەتىن 20 اقپان اسكەري شيەلەنىستىڭ ىقتيمال كۇنى دەپ بولجانۋدا.

"مەنىڭ ويىمشا، رەسەي سوعىس الەۋەتى بار ەكەنىن انىق بىلدىرگىسى كەلەدى. ماسكەۋ (سوعىس) قانداي بولۋى مۇمكىن ەكەنىنە دايىندالادى" دەدى "Newlines" ينستيتۋتىنىڭ گەوساياسي ساراپشىسى جانە بۇرىنعى ەۋرازيا ساراپشىسى ەۆگەنيي چاۋسوۆسكيي.

داعدارىسقا اقش پەن ۇلىبريتانيادان گورى تولەرانتتىلىق تانىتقان فرانسيا پرەزيدەنتى ەممانۋەل ماكرون وسى اپتادا ماسكەۋ مەن كييەۆكە بارعان. ول شيەلەنىستى ازايتۋعا تىرىسىپ جاتىر.

رەسەي پرەزيدەنتى پۋتين جانە ۋكراينا پرەزيدەنتى ۆلاديمير زەلەنسكييمەن كەزدەسكەننەن كەيىن ماكرون "كەلىسسوزدەردى ءارى قاراي جالعاستىرۋ مۇمكىن" دەپ سانايتىنىن ايتتى.