بۇگىن بارشا مۇسىلمانداردىڭ ەڭ ۇلىق مەرەكەسى - قۇربان ايت مەيرامى. بۇل مەرەكە ەڭ اۋەلى ايت نامازىن وقۋمەن باستالادى. ەلوردالىق مەشىتتەردە ايت نامازى تاڭعى ساعات 7:45 وقىلدى. قاسيەتتى قۇربان ايت مەرەكەسى  رامازان ايىنان كەيىن 70 كۇن وتكەن سوڭ تويلانادى. بيىل قۇربان ايت مەرەكەسى 24-26 قىركۇيەك كۇندەرى اتاپ وتۋدە. بۇل تۋرالى قامشى پورتالى قازاقپارتقا سىلتەمە جاساي وتىرىپ حابارلايدى.

بۇل كۇنى الەمدەگى بارشا مۇسىلمان قاۋىمى قۇرباندىققا مال شالىپ، ونىڭ ەتىن ۇشكە بولەدى. ءبىر بولىگىن تۇرمىسى تومەن وتباسىلارعا تاراتادى، ەكىنشى بولىگى ءوزىنىڭ وتباسىندا قالادى جانە ءۇشىنشى بولىگى قوناقتارعا ارنالعان مەرەكەلىك داستارحانعا قويىلادى.

سانيتارلىق-ەپيدەميولوگيالىق ەرەجەلەر مەن تالاپتارعا سايكەس استانا قالاسىندا مالدى قۇرباندىققا شالاتىن ارنايى ورىندار بەلگىلەندى.

ەسكە سالا كەتەيىك، نەگىزگى قۇرباندىق شالاتىن ورىن قوسشى ەلدى-مەكەنىنە جاقىن «التىن تاعا» مال بازارىندا ورنالاسقان. بۇدان باسقا، «پيششەكومبينات استانالىق» ج ش س، م. دۋلاتوۆ ك-سى، 191؛ «نۇربەرەكە 555» ج ش س، الاش تاسجولى، 30؛ «مەترو» سو، «شاۋشەن» شارۋا قوجالىعى، استانا-پاۆلودار تاسجولى، 9 كم؛  «تەمەش» شارۋا قوجالىعى؛ «استانا - سوفييەۆكا» تاسجولى، 7 كم؛ «ا. ەسجانوۆا» دك؛ «جايلاۋ»، الاش تاسجولى؛  «ماقسات 2007» ج ش س؛ تەمىرجولشىلار تۇرعىن الابى، اقجار ك-سى، 20 بويىنشا دا قۇرباندىق شالۋ الاڭدارى بار.

استانا قالاسىنداعى «نۇر استانا»، «ازىرەت سۇلتان» جانە «ءسادۋاقاس قاجى عىلماني» اتىنداعى مەشىتتەردىڭ الدىنداعى الاڭداردا كيىز ۇيلەر تىگىلدى. «ازىرەت سۇلتان» مەشىتىنىڭ قىزمەتكەرلەرى 200 وتباسىعا قۇرباندىق ەتى مەن ايتتىق پاكەتتەر تاراتتى. بۇدان بولەك، س.سەيفۋللين اتىنداعى اگروتەحنيكالىق ۋنيۆەرسيتەتىنىڭ ستۋدەنتتەرىنە 150 پاكەت، "الماتى" اۋدانىنىڭ اكىمدىگى تىزىمىندەگى الەۋمەتتىك از قامتىلعان وتباسىلارعا 125 پاكەت، «ازىرەت سۇلتان» مەشىتىنە ءوتىنىش ءبىلدىرىپ كەلگەن جاندارعا جانە استانا قالاسىنداعى ءتۇرلى قوعامدىق ۇيىمدارعا 325 پاكەت ۇلەستىرەتىن بولادى. بۇل تۋرالى «ازىرەت سۇلتان» مەشىتىنىڭ باسپا ءسوز قىزمەتى حابارلايدى.

قۇربان ايت مەرەكەسى اياسىندا قالالىق مەشىتتەردىڭ الدىنداعى الاڭداردا ۇلتتىق سپورت تۇرلەرىنەن جارىس (قازاقشا كۇرەس، اسىق اتۋ، ارقان تارتىس) جانە مادەني شارالار (كۇي، تەرمە ايتۋ جانە ت.ب.) ءوتىپ جاتىر، دەپ حابارلايدى ەلوردا اكىمدىگىنىڭ باسپا ءسوز قىزمەتى.