سوڭعى كەزدەرى قيىر شىعىستان ەۋروپالىق وداققا شەكارا اسىپ، جاقسى ءومىردى ماقسات تۇتىپ كەلگەندەر سانى كۇننەن كۇنگە ارتۋدا. ەو تا، وزگە بولەك مەملەكەتتەر دە ميگرانتتاردى قارسى الىپ، ورنالاستىرۋ تاراپىنان مۇمكىندىكتەرىن تىم جوعارى باعالاپ جىبەرىپ، سالدارىنان ءبىراز قينالىپ قالعانعا ۇقسايدى. بۇل داعدارىس جاڭا ماسەلەلەر تۋدىرىپ قانا قويماي، بوسقىنداردى ورنالاستىرۋ جونىندەگى دۋبليندىك كەلىسىمگە مۇشە-مەملەكەتتەر اراسىنداعى بۇرىنعى قاراما-قايشىلىقتارىن قايتا قوزعاۋعا ءماجبۇر ەتتى.

الەمدىك تاريحقا 2015 جىل ەۋروپانىڭ وڭتۇستىك جانە وڭتۇستىك-شىعىسىندا ورنالاسقان ەلدەردەگى بۇرىن سوڭدى بولماعان ميگراسيالىق داعدارىس كەزەڭى بولىپ ەنۋى ابدەن مۇمكىن. سەبەبى، ەۋروپالىق ايماققا شاراسىزدان قونىس اۋدارۋشىلار سانى ەشقاشان وسىنشالىق كوپ بولماعان. Swissinfo.ch اقپاراتتىق پورتالىنىڭ مالىمەتتەرى بويىنشا، 2015 جىلدىڭ قىركۇيەك ايىنداعى ءال-احۋالعا سايكەس ەۋروپاعا جەرورتا تەڭىزى ارقىلى وتكەندەر سانى 350 مىڭ ادامدى قۇراعان. بۇل كورسەتكىش 2014 جىلعى جاعدايمەن سالىستىرعاندا 60 پايىزعا جوعارى.

قازىرگى ۋاقىتتا گەرمانيانىڭ وزىنە اعىمداعى جىلدىڭ سوڭىنا دەيىن 800 مىڭ بوسقىن بارادى دەپ كۇتىلۋدە. بوسقىندار ىسىمەن اينالىساتىن شۆەيساريالىق فەدەرالدى سەكرەتارياتتىڭ بولجامى بويىنشا شۆەيسارياعا 2015 جىلى بوسقىن ستاتۋسىن سۇراپ باراتىندار سانى 29 مىڭعا دەيىن باراتىن كورىنەدى (2014 جىلعى كورسەتكىش 23770 ادامدى قۇراعان).

دەگەنمەن، بوسقىنداردى قورعاۋ ۇيىمىنىڭ مالىمەتتەرى بويىنشا، قازىرگى ۋاقىتتا بوسقىنداردىڭ 86 پايىزى ەۋروپادا ەمەس، دامۋشى مەملەكەتتەردە ءومىر ءسۇرىپ جاتىر. ماسەلەن، ليۆان مەملەكەتىنىڭ وزىندە قونىس اۋدارعاندار سانى حالىق سانىنىڭ 25 پايىزىن قۇرايدى.

بوسقىندار، نەگىزىنەن اۋعانستان، سيريا سىندى ازاماتتىق سوعىس ءجۇرىپ جاتقان ايماقتار مەن ەريترەيا ىسپەتتى قاتال ۇستەمشىل بيلىك ورناعان مەملەكەتتەردەن قونىس اۋدارۋدا.

سوڭعى جىلداعى ەۋروپاعا قونىس اۋدارىپ، باسپانا سۇراپ، رەسمي تۇردە ءوتىنىش بەرگەندەر سانى 660 مىڭنان اسادى. ەۋروپادا مۇنداي جاعداي سوڭعى رەت 1990 ج.ج. يۋگوسلاۆياداعى سوعىس كەزەڭىندە ورناعان بولاتىن.

نازگۇل نازار

«قامشى» سىلتەيدى