كوشى-قون قىزمەتى شەتەلدىك ازاماتتاردى پاتەرىنە العان تۇلعالار شەتەلدىكتىڭ كەلگەنى تۋرالى حابارلاۋعا مىندەتتى ەكەنىن ەسكەرتتى، دەپ جازادى Polisia.kz.
يمميگرانتتاردىڭ كەلۋى مەن ەلدە بولۋى جونىندەگى قاعيدالاردىڭ 9-تارماعىنا سايكەس، پاتەر يەلەرى مەن قوناق ءۇي، پانسيونات باسشىلارى شەتەلدىك ازاماتتىڭ كەلگەنىن ىشكى ىستەر ورگاندارىنا حاباردار ەتۋگە مىندەتتى.
"قۇرمەتتى قازاقستاندىقتار! قوناق ءۇي، حوستەل، پانسيونات جانە جاتاقحانا يەلەرى! پاتەرلەر مەن باسقا دا تۇرعىن ءۇي يەلەرى! قازاقستان رەسپۋبليكاسىنىڭ ىشكى ىستەر مينيستىرلىگى كوشى-قون زاڭناماسىنىڭ تالاپتارىن قاتاڭ ساقتاۋعا شاقىرادى. شەتەلدىك ازامات كەلگەن كۇننەن باستاپ 3 جۇمىس كۇننىڭ ىشىندە ىشكى ىستەر ورگاندارىنا مىندەتتى تۇردە حابار بەرىلۋى ءتيىس. وسى مەرزىمدى وتكىزىپ العان جانە كوشىپ كەلۋشىنىڭ كەلۋى تۋرالى ىشكى ىستەر ورگاندارىنا حابارلاماعان جاعدايدا جەكە جانە زاڭدى تۇلعا قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 518-بابى بويىنشا جاۋاپقا تارتىلاتىنىن ەسكەرتەمىز"، - دەيدى كوشى-قون قىزمەتى كوميتەتى ءتوراعاسىنىڭ مىندەتىن اتقارۋشى اسلان اتالىقوۆ.
اتالعان باپ بويىنشا زاڭدى تۇلعالار ءۇشىن 10-25 ايلىق ەسەپتىك كورسەتكىشكە (31 800 – 79 500 تەڭگەگە) دەيىن، ال قايتالانعان جاعدايدا 100 ايلىق ەسەپتىك كورسەتكىشكە (318 000 تەڭگەگە) دەيىن ايىپپۇل سالىنادى. جەكە تۇلعالارعا الدىمەن ەسكەرتۋ جاسالادى. زاڭ تالابىن قايتا بۇزعانى ءۇشىن 30 ايلىق ەسەپتىك كورسەتكىش نەمەسە 91 890 تەڭگە كولەمىندە ايىپپۇل قاراستىرىلعان.
پىكىر قالدىرۋ