پۋتين وبامانىڭ الدىن وراعانى جونىندە تىنىمسىز ايتىلىپ جاتقان اڭگىمە، جازىلىپ جاتقان اقپار كوپ بۇگىندە. دەگەنمەن، بۇل بار بولعانى شىندىقپەن جاناسپايتىن ۇگىت-ناسيحاتتىڭ قۇرالى ءھام پياردىڭ ۇيرەنشىكتى قادامى.
قازىرگى ساياسي جاعدايدى ورىندى باعالار بولساق، وباما رەسەيدىڭ يليم-گە قارسى كۇرەسىنە مۇلدەم قارسى ەمەس. ءبىراق، «يسلامدىق مەملەكەتتى» باتىستىق جاق جەڭە المايتىندىقتان نەمەسە پۋتين وباماعا قاراعاندا الدەقايدا ۇتىمدى كۇرەس جۇرگىزىپ، كوپ ءىستى از ۋاقىتتا تىندىراتىندىقتان ەمەس. بۇل رەتتە كوپقىرلى سەبەپ قانا ەمەس، استارى مول ساياسات جاتىر.
رف-نىڭ رەسمي تۇردە سيرياعا ەنۋى مەن يليم-گە شابۋىل جاساۋى «بارلىعىن ءوز موينىندا ارقالاۋعا ۇيرەنگەن» باتىستىق كواليسيانى ارتىق پروبلەمادان قۇتقاردى دەۋگە بولادى. ءبىرىنشى كەزەكتە، ءاربىر بومبالاۋ، ۇشاق ۇشىرۋ پروسەستەرى – سالىق تولەۋشىلەردىڭ ايالماي جۇمسالعان اقشاسى. بۇل، ارينە، ماسەلەنىڭ بەرگى جاعى عانا. ەكىنشىدەن، ماسكەۋدىڭ الدىنان سيرياعا جول اشۋ ارقىلى، امەريكاندىقتار رەسەيدىڭ ولار قولدان جاساعان باتپاعىنا بەلشەسىنەن باتاتىنىنا سەنىمدى. قاراپ وتىرساق، وقيعا سوعان سايكەسىنشە وربۋدە.
ال، رەسەيدىڭ قارۋلى كۇشتەرى، ءوز كەزەگىندە، يليم مەن سيريالىق وپپوزيسيا اراسىنان ايىرماشىلىق تاۋىپ، باس قاتىرىپ جاتقان جوق. «اقىرى، ەكەۋى دە اسادتى تاقتان تايدىرۋدى كوزدەيدى ەكەن، ەندەشە بىرىنەن ءبىرىن اجىراتىپ كەرەگى نە؟»، - دەدى مە ەكەن، كىم بىلەدى؟! سوندىقتان، بالكىم، «ابايسىزدا» سيريالىق وپپوزيسيا ورنالاسقان ايماقتى بومبالاپ كەتۋدەن دە تايىنار ەمەس شىعار.
وسى ىسپەتتى «اعاتتىقتار» جالعاسا بەرسە، ماسكەۋ ساۋ باسىنا ساقينانى ءوزى تىلەپ الماق. سالدارىنان، تەك يليم نەمەسە اسادتىق وپپوزيسيا عانا ەمەس، اسادتى الەم ساحناسىنان كەتىرۋدى كوزدەيتىننىڭ بارلىعى رەسەي قارۋلى كۇشتەرىنە قارسى كۇرەس اشادى. سوڭىندا بۇل سوعىستان ماسكەۋ وڭايلىقپەن شىعا الماسى انىق. كەرىسىنشە، وزگە تەرريتوريادا قاتاڭ قارجىلىق داعدارىس كەزەڭىندە سوعىسۋى رەسەيلىك حالىقتىڭ ۇكىمەتىنە دەگەن نارازىلىعىن عانا تۋدىرماق. وعان سەبەپ – «سيريانى جارىلقاپ، اقشانى اۋاعا شاشقانشا، اشىققان حالىقتى تويدىرسا ەكەن، قانەكەي؟» دەگەن حالىقتىڭ جان ايقايى بولماق.
كەز كەلگەن سوعىس، مەيلى ونىڭ ءتۇبىرى تەرەڭدە جاتسىن، يا كۇنى كەشە باستالعان بولسىن، سەبەپ ماڭىزدىلىعى جونىنەن الەمدىك دەڭگەيدە بولسىن، يا تىپتەن نەگىزسىز بولسىن، قالاي بولعاندا دا ول – ورنى تولماس شىعىن. وعان قوسا، ول قاشاندا بوپسالاۋدىڭ، اياماي پايدا تابۋدىڭ، الدەبىر سوعىسقا قاتىناسقان ەلدەرگە قاتىستى وزىندىك ماقساتتارعا جەتۋدىڭ ۇتىمدى جولى سانالادى.
سوندىقتان، ۆاشينگتون ۇكىمەتى سيرياداعى داۋ-دامايدىڭ شاماسى جەتكەنشە جالعاسا بەرۋىنە، وعان قاتىسۋشى مەملەكەتتەردىڭ كوبەيە بەرۋىنە تىپتەن قارسى ەمەس. جاقىندا عانا ساۋد ارابياسىنىڭ رۋحاني كوشباسشىلارىنىڭ رەسەيگە قارسى جيھاد ۇيىمداستىراتىنى جونىندەگى مالىمدەمەسى سونىڭ ايقىن دالەلى ەمەي نەمەنە؟!
ساۋديتتەردىڭ، رەسەيلىكتەردىڭ جانە قيىر شىعىستاعى وزگە دە مەملەكەتتەردىڭ سوعىسقا قاتىسۋى ولاردى، بىرىنشىدەن، قارجىلاي ءالسىز ەتەدى، ەكىنشىدەن، قالاي بولعاندا دا وسال تۇستارىنىڭ كوپتەپ تابىلۋىنا تۇرتكى بولادى، جانە ۇشىنشىدەن، الدەبىر سۇراقتارعا بايلانىستى كونگىش بولىپ كەتۋىنە اسەر ەتپەك.
رەسەيلىك قارۋلى كۇشتەردىڭ ءيليم-دى از ۋاقىتتا جاۋلاپ الاتىنىنا سەنۋ – ۇلكەن اقىماقتىق. ءبىراق اسكەري قادامدارىنىڭ كەلەشەگى جوقتىعىنان پۋتين سيريادان اسكەرىن الىپ كەتەدى دەپ ويلاۋ – ودان ۇلكەن اقىماقتىق سانالادى. ونىڭ ۇستىنە سيرياداعى جاعداي رەسەيدىڭ قاتىسۋىنان كەيىن بۇرىنعىدان ارتىق ۋشىققانىن ەسكەرسەك، رەسەيدىڭ سيرياداعى بۇل ساپارى ۇزاققا سوزىلدى دەۋگە تولىق نەگىز بار...
نازگۇل نازار
پىكىر قالدىرۋ