سوقىرلىقتى الدىن-الۋ بويىنشا حالىقارالىق اگەنتتىك مالىمەتىنشە شامامەن 285 ميلليون ادام كورۋ قابىلەتىنىڭ ناشارلاۋىنان زارداپ شەگەدى. بۇل كورسەتكىشتىڭ 19 ميلليونىنان استامى-بالالار، ال 39 ميلليون ادام تىپتەن كورۋ قابىلەتىنەن ايرىلعان جاندار. ەسكەرە كەتەتىن ءبىر جايت، ، ەگەر دە دەر كەزىندە دارىگەر كومەگىنە جۇگىنىپ، قاجەتتى الدىن-الۋ مەن كۇتىم شارالارى جۇرگىزىلسە، وسى كورسەتكىشتىڭ 80 %-ىن الدىن-الۋعا بولار ەدى

            قازاقستاندا رەسمي دەرەك بويىنشا جىلىنا شامامەن 1 ميلليون تۇرعىن وفتالمولوگ دارىگەر كومەگىنە جۇگىنەدى.  نەگىزگى سەبەپ-قابىنۋ اۋرۋلارى، الىستان كورمەۋشىلىك، كاتاراكتا، گلاۋكوما، جاس شاماسى ماكۋليارلى دەگەنەراسيا. جىل سايىن ەلىمىزدە كورۋ قابىلەتى بويىنشا  2000-عا جۋىق ادام مۇگەدەك اتانادى. تىركەلگەن  زاعيپ جاندار سانى 56 000 ادامدى قۇراسا، ونىڭ 1800 بالالار بولىپ سانالادى. ءبىر وكىنىشتىسى، كورۋ قابىلەتى بويىنشا تىركەلگەن مۇگەدەكتەردىڭ باسىم بولىگى ەڭبەك جاسىنداعى جاس ازاماتتار ەنشىسىندە. بۇل ستاتيستيكا كىمدى بولسا دا ويلاندىرا قوياتىنى ءسوزسىز.    

   بۇگىن - دۇنيەجۇزىلىك كوز جانارىنىڭ كۇنى (World Sight Day).  بۇل كۇنى الەمنىڭ بارلىق وفتالمولوگتارى كوپشىلىكتى كوز جانارىن ساقتاپ قالۋ مەن  كوزدىڭ ءقورۋ قابىلەتىنەن ايرىلعان جانداردىڭ ساۋىعۋى ماسەلەسىنە نازار سالۋعا شاقىرادى.

       تۇرسىنگۇل  بوتابەكوۆا، ق ر ۇعا –كوررەسپوندەنت مۇشەسى،  مەديسينا عىلىمدارىنىڭ دوكتورى، پروفەسسور:

«كوز-وتە كۇردەلى ءارى نازىك اعزا، سالماعى نەبارى 7-8 گرامم. ءاربىر ادام بالاسى كوزدىڭ  قانشالىقتى ماڭىزدى ەكەنىن ءسوزسىز بىلەدى.  الايدا بۇگىندە وفتالمولوگتار تەك قانا كوز اۋرۋلارىن ەمدەپ قانا قويماي، ەمدەلۋشىلەردىڭ نانىمى مەن مەنتاليتەتىمەن دە قاتار  كۇرەسىپ كەلۋدە. وعان سەبەپ، ەمدەلۋشى ءوزىنىڭ اعزاسىنا قاجەت دەڭگەيىندە نازار سالماي، كۇتىم جاساماي دارىگەردىڭ الدىنا مەديسيناعا زور ءۇمىت ارتىپ كەلۋى!»

                بۇگىنگى تاڭدا  وفتالمولوگيالىق اۋرۋ تۇرلەرىنە جاڭا تۋىلعان سابيلەر دە شالدىعۋدا، باسىم كوپشىلىگى شالا تۋىلعان نارەستەلەر. ەلىمىزدە جىلىنا  اي-كۇنى تولماعان شامامەن 20 مىڭ  ءسابي دۇنيەگە كەلەدى، ونىڭ 20 % شالا تۋىلعاندار رەتينوپاتياسى  دەرتىنە شالدىعادى، ەگەر دە بۇل سابيلەر دەر كەزىندە دارىگەرگە قارالماسا جانە  ەم-دوم شارالارىن الماسا، بولاشاقتا كورۋ قابىلەتىنەن مۇلدەم ايرىلۋى مۇمكىن.  

     جالپى ءبىلىم بەرۋ باعدارلامالارىناڭ قۇردەلەنۋى، جاپپاي كومپيۋتەرلەنۋ، كورۋ  مۇشەسىنە   زور سالماق تۇسىرۋدە. ماسەلەن، مەكتەپ قابىرعاسىن اتتاعان ساتتە كورۋ قابىلەتىنىڭ ناشارلىعى 4% بالالاردا كەزدەسسە، جوعارى سىنىپتاردا بۇل سان  40-45% قۇرايدى.  
     الەمدە ءومىر ءسۇرۋ جاسىنىڭ ۇزاقتىعى ۇلعايعان سايىن، جاس شاماسىنا قاتىستى كاتاركتا، گلاۋكوما سىندى اۋرۋ تۇرلەرىنىڭ سانى ارتۋدا.    

          دۇنيەجۇزىلىك كوز جانارىنىڭ كۇنى الەمدە  كورۋ قابىلەتىنىڭ ناشارلاۋىن الدىن-الۋ ماقساتىندا ءتۇرلى ءىس-شارالار وتەدى. بۇل كۇنى وفتالمولوگتار بارلىعىن جاسىنا، ءومىر ءسۇرۋ سالتىنا قاراماستان دارىگەرگە قارالىپ تۇرۋعا شاقىرادى. كەز كەلگەن اۋرۋدى باستاپقى ساتىسىندا ەمدەگەن وڭ ناتيجەگە جەتۋدىڭ بىردەن-بىر كەپىلى!

     8 قازان كۇنى  قازاق كوز اۋرۋلارى عزي  وسى داتا اياسىندا اشىق ەسىك كۇندەرىن وتكىزىپ، بالالار ءۇيى مەن قارتتار ۇيىندە قايىرىمدىلىق تەكسەرۋ شارالارىن جۇرگىزەدى.  بۇل ءۇردىس ەلىمىزدىڭ باسقا دا ايماقتارىندا جالعاسىن تاپپاق.

ايگەرىم كوجاحمەتوۆا