پحەنيان، سولتۇستىك كورەيا. الەمنىڭ ءبىرشاما ەلدەرى، اسىرەسە امەريكاندىقتار ءۇشىن سولتۇستىك كورەيا جەر بەتىندەگى ەڭ جابىق، رەپرەسسيۆتى جانە بۇگىنگى قوعامنان وقشاۋلانعان مەملەكەت بولىپ سانالادى.

ەسەسىنە، توتاليتارلى سانالاتىن ەلدىڭ تۇرعىندارى وزدەرىنىڭ تاڭداۋلى حالىق ەكەنىنە، الەم قىزىعاتىن جۇماق-مەكەندە تۇراتىنىنا، سونىمەن قاتار، كوشباسشىلارى ولاردى مەملەكەتتەن تىسقارى ورنالاسقان كەز كەلگەن زۇلىمدىق ارەكەتتەردەن قورعاپ الىپ شىعا الاتىندىعىنا شىن سەنەدى. ولار تۋرالى ايتىلاتىن اڭگىمەلەردىڭ بارلىعىن ستەرەوتيپكە عانا بالايتىن كورىنەدى. بۇل تۋرالى «قامشى» پورتالى ماتەريال ۇسىنادى.

بۇگىنگى مەرەكەگە وراي حالىقارالىق جۋرناليستەرگە ارنالىپ بارلىق جاعداي جاسالعان. رەسمي اۆتوبۋستان ولار بىردەن سولتۇستىك كورەيلىك ۇكىمەتتىڭ الدىنان تۇسەدى ەكەن. كوممۋنيزمنىڭ قۇرىلعانىنا 70 جىل تولۋىنا وراي وتەتىن مەرەكەلىك ءىس-شارا بۇگىن ءدال وسى جەردەن باستاۋ الاتىن بولادى.

مەملەكەتتىڭ اسكەري قىزمەتشىلەرى شەرۋگە دايىندىق ۇستىندە. شەرۋگە بالاقايلار دا قاتىساتىن بولادى. كوبىسىنىڭ جاسى بەستەن ەندى عانا اسقان. ولار، الدىڭعى قاتاردا دابىلشىلاردان قالىسپاي، بىرگە ادىمداپ جۇرەتىن بولادى. ال، جولدىڭ جيەكتەرى قىزىل تۇسكە بويالىپ، پاتريوتتىق بەلگىلەرمەن ورنەكتەلگەن ەكەن. مۇنىڭ سايكەسىنشە دۇرىس ءارى كورنەكتى شىعۋى ونداعان تازالىق توپتارى مەن جۇمىس بريگادالارى ەڭبەگىنىڭ ارقاسى ەكەن.

مەملەكەتتىڭ نەگىزىن قالاعان كيم ير سەن مەن ونىڭ ۇلى كيم چەن ءيردىڭ سۋرەتتەرى بەينەلەنگەن بەلگى تاعىنعان شەنەۋنىكتەردىڭ ەزۋلەرىنەن كۇلكى كەتەر ەمەس. مۇنىسى ارقىلى ولار ەلدە الەۋمەتتىك جۇمىس جۇماعى بار ەكەنىن، پارتيا مەن بۇگىنگى مەرەكەلىك شەرۋدىڭ باسىندا «كەرەمەت مەملەكەتتىك قايراتكەر، يدەولوگيا شەبەرى، ودان قالسا دانىشپان ادام» تۇرعاندىعىن ماقتانا كورسەتكىسى كەلەتىنىن دالەلدەپ تۇر ەكەن.

اۋەجايدان مەرەكەلىك وقيعا وتەتىن پحەنيانعا دەيىنگى ءبىر ساعاتتىق جول بويىندا «كەمەڭگەر باسشىنىڭ» اكەسى مەن اتاسىنىڭ سۋرەتتەرى كوپتەپ ىلىنگەن. ەسەسىنە بىردە-بىر ءوزىنىڭ سۋرەتى جوق. بۇل ونىڭ تەگىنە دەگەن تاعزىمى ەكەن-مىس.

جۋرناليستەردى پحەنيانعا جەتكىزگەن «Air Koryo» اۋە كومپانياسىندا تاراتىلعان جۋرنالداردىڭ وزىندە «بۇل كەرەمەت باسشىسى بار، بوستاندىق پەن باقىتقا تولى ءومىر يەلەرى – كارىس حالقىنىڭ 70 جىلدىق جەڭىسى» دەگەن جولدار بار.

ۇشۋ بارىسىندا 20-شى عاسىردىڭ پاتريوتتىق اندەرى مەن بەينەباياندار قويىلدى. كوبىسى روك جانرىندا. ءبىر قىزىعى، ءسىز پاتريوتتىق تاقىرىپتاعى كەز كەلگەن روك-توپتار مەن انشىلەردىڭ اۋەنىن تىڭداي الاسىز. ءبىراق، وڭتۇستىك-كورەيلىك ءان تىڭداۋ بىردەن گۋلاگ-قا جولداما الۋمەن تەڭ.

اۋەجايدا  وسىدان بىرنەشە اپتا بۇرىن تاتتىلەر، شامپان، ءتۇرلى كوستيۋمدەر ساتاتىن كافە-بارلار مەن دۇكەندەر اشىلدى.

ال، بۇۇ-نىڭ مالىمەتى بويىنشا سولتۇستىك كورەيا حالقى الەمدەگى ەڭ اش حالىقتاردىڭ ءبىرى سانالادى.

قىسقاسى، كوممۋنيزمنىڭ 70 جىلدىعى ەمەس، كەيىپ پەن شىندىقتىڭ ارپالىسى...

دەرەككوز: nbcnews.com

نازگۇل نازار