قازاقستاندا 2016 جىلى نان 30%-عا قىمباتتاۋى مۇمكىن 

اۋىلشارۋاشىلىق ءمينيسترى اسىلجان مامىتبەكوۆ قىمباتتاۋدىڭ نە سەبەپتى كۇتىلىپ وتىرعاندىعىن ءتۇسىندىردى. بۇل تۋرالى 1tv.kz-كە سىلتەمە جاساي وتىرىپ «قامشى» پورتالى حابارلايدى.

اۋىلشارۋاشىلىق ءمينيسترىنىڭ ايتۋىنشا، باستى الەۋمەتتىك ازىق-تۇلىككە باعانى استىقتىڭ ساتىپ الۋ باعاسىن قارجىلاندىرۋ ارقىلى جاساندى جولمەن بارىنشا ۇستاپ تۇرۋعا تىرىسقان.

الايدا، نارىق جاعدايىندا مۇنداي قارجىلىق جەڭىلدىكتەردى بەرۋدى جالعاستىرىپ، ودان ءارى تومەن باعانى ۇستاپ تۇرۋ مۇمكىن ەمەس دەيدى ول.

«ءبىز نارىق باعاسىنا سايكەس ەكسپورتقا شىعارامىز. ال ىشكى نارىققا ۇكىمەت كومبيناتتار استىقتى تومەن باعامەن الۋى ءۇشىن كومەكقارجى بولەدى. ياعني ۇكىمەت ناننىڭ قىمباتتاماۋىن قامتاماسىز ەتەتىن كومەكقارجى بولە وتىرىپ، فەرمەرلەرگە ونىمدەرىن نارىقتا قالىپتاسقان باعامەن ساتۋعا مۇمكىندىك بەرەدى»، – دەيدى مامىتبەكوۆ.

مەكەمە باسشىسى ىشكى باعانىڭ قۇلدىراۋىنان فەرمەرلەردىڭ تابىسى جوعارىلاماي جاتقانىنا دا نازار اۋدارتتى.