تۇڭعىش عارىشكەر ايەل ۆالەنتينا تەرەشكوۆا مىنگەن اۆتوبۋس بۇگىندە قوستاناي وبلىسىنداعى شاعىن اۋىلداردىڭ بىرىندە ساقتاۋلى. بۇل تۋرالى «قامشى» پورتالى «حابارعا» سىلتەمە جاساي وتىرىپ حابارلايدى.

قامىستى اۋدانىنداعى شارۋاشىلىقتىڭ جەكە كوللەكسياسىندا كونەنىڭ كوزىندەي بولىپ 30 شاقتى رەتروكولىك ساقتالعان.  سەرگەي چينچۋك - گاراج مەڭگەرۋشىسى. ونىڭ كوپ ۋاقىتى وسى كولىكتەردىڭ اراسىندا وتەدى. مۇندا تۇرعان تەحنيكالاردىڭ ءارقايسىنىڭ ءوز تاريحى، ءوز تاعدىرى بار. مەڭگەرۋشى ولار جايلى اڭگىمەلەۋدەن جالىقپايدى. مىسالى، «ۆيلليس»  اسكەري كولىگىن سوناۋ سۇراپىل سوعىس جىلدارى بارلاۋشىلار ۆزۆودىنىڭ كومانديرى مىنگەن. 

«كولىك كورگەننەن-اق قاتتى قىزىقتىردى. عالامتوردى اقتارىپ كوپ ماعلۇماتقا قانىقتىم. بۇل ماشينانى العاش كورگەندە مەنىڭ كوز الدىما بىردەن سوعىس دالاسى ەلەستەدى. مۇندا جۇرگىزۋشى سولدات وتىرعان. ال، وفيسەر قانداي دا ءبىر بارلاۋ شاراسىن جۇرگىزۋدە نەمەسە جاي عانا ماڭىزدى ءبىر اقپارات اكەلە جاتىر. بۇل تاريح قوي. ارينە، وسىدان كەيىن بۇل كولىككە دەگەن قۇرمەتىڭ ارتا تۇسەدى»، - دەيدى سەرگەي چينچۋك.

 مۇراجاي وتە  سيرەك كەزدەسەتىن بىرەگەي ەكسپوناتتارعا باي. ماسەلەن، ءىشى تولىق جابدىقتالعان مىنا اۆتوبۋس عارىشكەرلەردى تاسىمالداۋعا ارنالعان. قازاقستاندا نەبارى ەكەۋ-اق. ءبىرى - بايقوڭىردا، ەكىنشىسى وسى التىنسارين اۋىلىندا. بۇل كولىككە كەزىندە تۇڭعىش عارىشكەر ايەل ۆالەنتينا تەرەشكوۆا دا مىنگەن. جالپى تاريحي تۇلعالاردىڭ قولىنىڭ تابى قالعان تەحنيكالار مۇندا از ەمەس.  مىسالى، 1949 جىلى شىققان «زيس-110» اۆتوكولىگى. كەزىندە بۇل ماشينانى مارشال جۋكوۆتىڭ ءوزى مىنگەن كورىنەدى. كەلەسى «گاز-14» - كەڭەس ۇكىمەتى مۇشەلەرىنىڭ قىزمەت اۆتوكولىگى. جالپى ەكسپوناتتاردىڭ ىشىندە كونە كلاسسيكالىق ماشينالار از ەمەس. سونىڭ ءبىرى - «زيم» ماركاسى. سودان كەيىن تۇرعان ۇلى وتان سوعىسى كەزىندە اسكەريلەر مىنگەن «گاز-67» اۆتوكولىگى. ماشينالار مۇراجايىندا وسىنداي-وسىنداي 30-دان استام جادىگەر ساقتاۋلى تۇر. مۇنداي عاجايىپ مۇراعات شاعىن اۋىل تۇگىلى، ءىرى قالالاردىڭ وزىندە كەزدەسە بەرمەيتىنى انىق. الۋان تاريحتىڭ كۋاسى بولعان كونە كولىكتەردىڭ ءقايسىبىرى سىيلىققا كەلگەن، ءقايسىبىرىن شارۋاشىلىق قاراجاتىنا ساتىپ الىنعان. مىسالى، مىناۋ تراكتور 1949 جىلى ستالينگراد زاۋىتىندا جاسالىپتى. اۋىل شاۋاشىلىق كولىگى وسىدان 40 جىل بۇرىن كولگە باتىپ كەتكەن. ايتەۋىر تراكتورشى امان قالسا كەرەك. كەيىن مۇراجايدىڭ نەگىزى قالاۋشىلار باتپاققا باتىپ كەتكەن تراكتور جايلى اۋىل تۇرعىندارىنان ەستىپ، ءبىلىپ، سۋ استىنان تارتىپ الىپ شىعىپتى.  قانشا ەسكى بولسا دا، مۇنداعى تەحنيكالاردىڭ ءبارى دە ءجۇرىپ تۇر. رەترو كولىكتەر جىل سايىن جەرگىلىكتى جەردە ءوتىپ تۇراتىن مەرەكەلىك شەرۋگە قاتىسادى. كونەلىگىمەن دە، تاريحتىڭ كومبەسى بولعاندىعىمەن دە قىمبات مۇراجاي بۇل كۇندە قامىستى اۋدانىنىڭ عانا ەمەس، تۇتاس ايماقتىڭ ماقتانىشى اينالعان. 

 "قامشى" سىلتەيدى