قۇندىزدىڭ داڭقىن شىعارعان ونىڭ تۇگى بولعانىمەن، سول تۇكتەر قۇندىزدىڭ ءوزى ءۇشىن قىمبات زات ەمەس. ول ءتىپتى وزىنە اسا ءماندى بولىپ ەسەپتەلمەيتىن زاتتىڭ قالايشا داڭقىن شىعارىپ جۇرگەنىنە تاڭ قالعان بولار ەدى. تاريح تا- سول. وعان ادامنىڭ ىزگى ارمانى، ءماندى ماقساتى، ماحابباتتارى قاجەت ەمەس. ول ادامداردىڭ بويىنان وزىنە كەرەگىن عانا الادى. ەگەر سان مىڭداعان ادامداردىڭ ءارۋاقتارىن ءتىرىلتىپ السا، ولار دا وزدەرى ءۇشىن سونشالىق ماڭىزدى ەمەس زاتتاردىڭ تاريحتا دارىپتەلگەنىنە قاراپ، الگى قۇندىز سەكىلدى قاتتى تاڭ قالعان بولار ەدى. ءتىپتى قايداعى ءبىر ماعىناسىز، جاڭساق ماقساتتارمەن سالىنعان اۋرە پيراميدالار تاريحتا قالادى، ال ەڭ ماڭىزدى زات-وسىنى سالعان ادامداردىڭ اۋىر ازابى، قايعى-قاسىرەتى، كوز جاسى قالمايدى... تاريحشىلار تاريحي وقيعالارعا ادامدىق قاسيەت، ادىلەت تۇرعىسىنان كەلۋدىڭ ورنىنا وقيعانىڭ سىرتقى ناتيجەسى مەن حرونولوگيالىق ەسەبىن شىعارۋدان باسقانى بىلمەيدى. ولار ءۇشىن تاريحي وقيعالار كىم جەڭسە، سولاردىكى ءجون، سولاردىكى قاجەتتىلىك، سولاردىكى ءادىل... ياعني ماكەدونسكييدىڭ قاندى جورىقتارى قاجەتتىلىك، سەزاردىڭ، شىڭعىسحاننىڭ، ناپولەوننىڭ قاندى جورىقتارى تاريحي قاجەتتىلىك... ءبىراق سول تۇستا توگىلگەن قان مەن كوز جاسىنىڭ، جان ازابىنىڭ نە ەكەنىن بۇلار تۇسىنە مە؟ ەگەر سول تۇستا قۇربان بولعان ءبىر ادامنىڭ رۋحىن قايتا ءتىرىلتىپ اكەلىپ، لابوراتوريادا تەكسەرەر بولسا (ەگەر سونداي ءبىر مۇمكىندىك بولسا)، سول جالعىز ادامنىڭ جۇرەكتى قالجىراتار اششى ۇنىنەن وسىناۋ توعىشار تاريحشىلار قانشا زاتتى تۇسىنەر ەدى. ال سول اششى قارعىستى مىڭ-ميلليون ەسە،ميلليارد ەسە كوبەيتسەڭىز، وسى سۇمدىقتى بەس سەكۋند ەستىپ، توزۋگە كىمنىڭ جۇرەگى شىدار ەدى؟
تولەن ابدىك ۇلى، «اقيقات» پوۆەستىندەگى روبەرتتىڭ ءسوزى
پىكىر قالدىرۋ