2015 جىل ەگەمەندى ەلىمىزدىڭ تاريحىندا ەرەكشە ورىن الاتىن ايتۋلى جىلداردىڭ ءبىرى بولىپ وتىر.
بيىل بابالار رۋحىن، تاريحىمىزدى قۇرمەتتەۋگە باعىتتالعان «قازاق حاندىعىنىڭ 550 جىلدىعى»؛
قازاقستاننىڭ زايىرلى مەملەكەت، دامىعان ەلدەردىڭ قاتارىنا قوسىلىپ كەلە جاتقانىن دالەلدەيتىن اتا زاڭىمىز – كونستيتۋسيامىزدىڭ 20 جىلدىعى؛
ەلىمىزدىڭ تاتۋلىق پەن بىرلىكتىڭ، تىنىشتىقتىڭ سيمۆولى ەكەنىن كورسەتەتىن اسسامبلەيانىڭ 20 جىلدىق مەرەيتويى بولدى.
2015 جىلى پرەزيدەنت سايلاۋى وتكىزىلىپ، بىزدەر - قازاقستان حالقى ەلباسىمىزدى قالاي قۇرمەت تۇتاتىنىمىزدى تاعى دا كورسەتتىك.
وسى شارالاردىڭ ءوتۋىنىڭ ءوزى قازاقستاندا ورىن العان بەيبىتشىلىك پەن ءدىن ارالىق، ۇلت ارالىق تاتۋلىقتىڭ بەلگىسى.
بيىلعى جىلى ەلىڭمىزدىڭ تاۋەلسىزدىك جولىنداعى العاشقى قادامدارىنىڭ ءبىرى بولعان «جەلتوقسان وقيعاسىنا» 29 جىل تولادى.
كەشەگى قاھارلى قىستا، ەگەمەندى ەلىمىزدىڭ ەرتەڭى ءۇشىن، بۇگىنگى جارقىن بولاشاق ءۇشىن الاڭعا شىققان جاستاردىڭ – بۇگىنگى ورتا بۋىن ءبىزدىڭ زامانداستارىمىزدىڭ الدىندا تۇرعان مىندەت بۇگىنگى جاستاردى وتاندى سۇيۋگە، ەل مەن جەردى قورعاۋعا تاربيەلەۋ.
وسىعان بايلانىستى، «جەلتوقسان وقيعاسىنىڭ» 29 جىلدىعى قارساڭىندا الماتى قالالىق اكىمشىلىگىمەن بىرلەسە وتىرىپ، ءبىرقاتار ءىس-شارالار جۇزەگە اسىرىلماق. سونىمەن قاتار، قالانىڭ اۋدان اكىمدەرى دە وزدەرىنىڭ جەكە جوسپارلارىن بەكىتتى.
16-17 جەلتوقسان قارساڭىندا جەلتوقساندىقتار قالامىزدىڭ بارلىق جوعارى وقۋ ورىندارىندا ستۋدەنتتەر مەن ورتا مەكتەپتەردە وقۋشىلارمەن كەزدەسۋ ۇيىمداستىرىلماق، «جەلتوقسان اندەرى» اتتى ءان كەشى جانە باسقا دا كوپتەگەن ءىس-شارالار اتقارىلماق.
وسىنىڭ بارلىعى 2016 جىلى بولاتىن «ۇلت ازاتتىق كوتەرىلىستىڭ» 100 جىلدىعى، «جەلتوقسان وقيعاسىنىڭ» 30 جىلدىعى جانە تاۋەلسىزدىكتىڭ 25 جىلدىعى قارساڭىنداعى دايىندىق بولادى.
سول سەبەپتى، ءبىز - جەلتوقسان ۇيىمدارىنىڭ وكىلدەرى رەسمي تۇردە مالىمدەيمىز:
- «جەلتوقسان وقيعاسىن» ساياسيلاندىرۋعا؛
- ونى بەلگىلى توپتاردىڭ جەكە باس مۇددەسىنە پايدالانۋعا؛
- سول ارقىلى ەلىمىزدەگى بەيبىتشىلىك پەن تاتۋلىقتى بۇزۋعا؛
- ۇلتارالىق ارازدىقتى قوزدىرۋعا؛
- تاۋەلسىزدىك تۋىن جىعىپ، ەلىمىزدىڭ شاڭىراعىن شايقالتۋعا جول بەرمەيمىز.
قۇرمەتتى ازاماتتار، ءبىز «جەلتوقساندىقتار» ۇلتتىق دياسپورا وكىلدەرىن، ۇكىمەتتىك ەمەس ۇيىمداردى، ساياسي قۇرىلىمداردى جانە بارشا جۇرشىلىقتى الداعى اتاۋلى مەركەلەردى اتاپ وتۋدە ۇيىمشىلدىق تانىتىپ ات سالىسۋعا رەسمي تۇردە شاقىرامىز!
پىكىر قالدىرۋ