«تەران»، «باتىستىڭ سوڭعى ديكتاتورى»، «ورىس ماريونەتكاسى». ءيا، بۇل بەلارۋسسيا پرەزيدەنتى الەكساندر لۋكاشەنكوعا قاتىستى ايتىلاتىن تەڭەۋلەر. تۇتاس مەملەكەتتى 1991 جىلدان باستاپ جۇمسا  جۇدىرىعىندا، اشسا الاقانىندا ۇستاپ كەلە جاتقان پرەزيدەنت بۇگىنگى كۇننىڭ ەڭ تالقىلانىپ جۇرگەن تاقىرىبى.

            ماسەلە مىنادا:  وتكەن دەمالىس كۇندەرى بەلارۋسسيادا پرەزيدەنت سايلاۋى ءوتتى. ونىڭ ناتيجەسى جۇما كۇنى تولىق بەلگىلى بولادى-مىس. ءبىراق ساراپشىلار لۋكاشەنكونى بۇگىننەن باستاپ قۇتتىقتاپ جاتىر. بەيرەسمي اقپارتتارعا سۇيەنسەك، ول سايلاۋشىلاردىڭ 81% داۋىسىن جيناعان ەكەن. دەمەك سوزىندە تۇردى.

            بۇلاي دەيتىنىمىزگە دە سەبەپ بار. لۋكاشەنكو ءدۇيىم جۇرتتىڭ الدىندا ءوزىنىڭ ماقساتى 80% داۋىستى جيناۋ دەپ جاريالاعان بولاتىن. ەندى مىنە الەشا 5ء-شى رەت قاتارىنان بەلارۋسسيانىڭ پرەزيدەنتى اتانىپ وتىر.

            ديكتاتورلىق ساياساتقا باتىستىڭ كوز- قاراسى ايتپاسا دا بەلگىلى. ساراپشىلاردىڭ ايتۋىنشا تەراننىڭ بۇل سايلاۋدا جەڭىپ شىعاتىنىنا ەشقانداي كۇمان بولماعان. مىنە، كەرەك بولسا... ەندەشە قۇتتى بولسىن. سايلاۋلاردا جەڭەتىن، تىك مىنەزدى كەلەتىن، ەلگە كومەك بەرەتىن باسشىنىڭ اتى كىم؟ «لۋ-كا-شەن-كو»...

            لۋكاشەنكونىڭ جەڭىسكە جەتۋىمەن سەرىكتەس مەملەكەتتىڭ باسشىلارى قۇتتىقتاۋ جاريالاعان.

            ەندىگى كەزەك مىنادا، لۋكاشەنكونىڭ پرەزيدەنت سايلاۋىندا جەڭىسكە جەتۋىنە تۇتاس بەلارۋسسيا ورنىنان تۇرىپ، قول شاپالاقتاپ قۋاندى دەۋگە كەلمەيدى. «ازاتتىق.ورگ»-تىڭ مالىمدەمەسىنە سۇيەنەتىن بولساق، «ەسكى-جاڭا» پرەزيدەنتتىڭ قايتا سايلاۋىنا بايلانىستى ەلدە تولقۋلار بولعان. «تەران - كەت»، «ديكتاتۋراعا بويكوت»، «بەلارۋسسيانىڭ لۋكاشەنكومەن بايلانىسى جوق» دەگەن قاعازدارى بار 200-دەن استام ازامات مينسكىنىڭ كوشەسىن شۋلاتتى كەلىپ.

            ءبىراق ايتا كەتۋىمىز كەرەك، بۇل ميتينگتەر لۋكاشەنكونىڭ ءار سايلاۋىنان كەيىن بولاتىن ءۇردىس. سوندىقتان «باتيا»-نىڭ كوڭىل كۇيى تۇسە قويماعان بولۋى كەرەك.

            P.S. ايتا كەتەتىن تاعى ءبىر جايت. لۋكاشەنكونىڭ قارسىلاستارى دا ەل اراسىندا  اتاعى جەر جارىپ، ءقاۋىپ توندىرەتىن ساياساتكەرلەر ەمەس. سايلاۋ ناتيجەسى مىناداي بولادى دەپ كۇتىلۋدە. سەرگەي گايدۋكيەۆيچ 5،2% ، نيكولاي ۋلاحوۆيچ — 1،4%، تاتيانا كوروتكيەۆيچ — 4،9%، «بارلىعىنا قارسى» - 7،1%. ءيا، بۇل كورسەتكىشپەن باتىستىڭ ەڭ مىقتى ساياساتكەرلەرى دە جەڭىسپە جەتپەگەن بولار. ءسوز سوڭى وسى. جىعىلعان سۇرىنگەنگە كۇلەدىنىڭ كەيپىن كيىپ لۋكاشەنكو باسقاراتىن ەلدىڭ ەنجارلىعىن تالقىلاپ وتىرعان جايىمىز بار.

ايان ازامات

«قامشى» سىلتەيدى