گەرمانيانىڭ درەزدەن قالاسىندا مىڭداعان ادامنىڭ باسىن قۇراعان «PEGIDA» انتييسلاميستىك قوزعالىسىنىڭ جاڭا اكسياسى ءوتتى. بۇل تۋرالى «قامشى» پورتالى «Sächsische Zeitung» ايماقتىق گازەتىنە سىلتەمە جاساي وتىرىپ حابارلايدى. «ەۋروپا پاتريوتتارى باتىستىڭ يسلاميزاسيالانۋىنا قارسى» دەگەن ۇرانمەن شىققاندار بوسقىنداردىڭ ەل تابالدىرىعىن اتتاۋىنا مۇمكىندىك جاساپ جاتقان انگەلا مەركەلدىڭ ۇكىمەتىنە قارسىلىق ءبىلدىردى.
بەلسەندىلەر قاۋىمى «جاپپاي قۋۋ كەرەك!»، «حالىق قالاۋى»، «مەركەل كەتۋى ءتيىس» دەگەن قىسقا ءماتىندى پلاكاتتار ۇستاپ، درەزدەن كوشەلەرىن كەشكىسىن تۇگەلىمەن ارالاپ شىققان. پلاكاتتاردىڭ بىرىندە كانسلەر حانىم «تەرەزا انا» رەتىندە بەينەلەنىپ، سۋرەتتىڭ استىندا «تەررورەزا انا» دەپ جازىلعان ەكەن.
سونىمەن قاتار، كوتەرىلىسشىلەر «مەركەل اناعا» جانە «گابريەل-وڭباعانعا» (ۆيسە-كانسلەر زيگمار گابريەلدىڭ اتى قاتە جازىلعان) دەپ جازىلعان ارنايى پلاكاتى بار، قولدان جاسالعان دار دايىنداعان ەكەن.
«PEGIDA» قوزعالىسىنىڭ نارازىلىق كورسەتۋى درەزدەندە وسىدان ءبىر جىل بۇرىن باستالىپ، قىسقا قاراي توقتاعان بولاتىن. سيريادان كەلگەن بوسقىنداردىڭ گەرمانياعا كەلۋى «ەۋروپالىق پاتريوتتاردى» كەزەكتى اكسيالار وتكىزۋىنە شابىتتاندىرىپ جىبەرگەن كورىنەدى. اتالمىش اكسيالار گەرمانيانىڭ شىعىسىندا ورنالاسقان بىرنەشە قالالاردا، سايكەسىنشە تيۋرينگيا جانە ساكسونيا جەرلەرىندە دە وتكەن بولاتىن. قوزعالىس مۇشەلەرى ميگراسيالىق ساياساتتىڭ كۇشەيتىلۋىن، بوسقىن ستاتۋسىنىڭ ساياسي قۋعىننىڭ قۇرباندارىنا عانا بەرىلۋىن تالاپ ەتىپ وتىر.
ەۋروپادا يسلام ءدىنىنىڭ قانات جايۋىنا قارسى بولعان نەمىس حالقىنىڭ، بالكىم، بۇلاي الاڭداۋشىلىق ءبىلدىرۋى دە ورىندى شىعار، كىم بىلەدى؟! سەبەبى، قازىرگى ۋاقىتتا ەۋروپا مەملەكەتتەرىنىڭ ىشىندەگى ەڭ تىنىش ەل – گەرمانياعا حالىقارالىق تەرروريزمنىڭ ورتاسىنا اينالۋ ءقاۋپى ءتونىپ وتىر. بۇل تۋرالى «Funke» مەدياتوبىنىڭ گازەتىندە جاريالانعان سۇحباتىندا گەرمانيا ىشكى ىستەر ءمينيسترى توماس دە مەزەر بىلاي دەپ مالىمدەمە جاساعان بولاتىن: «گەرمانيا ۇكىمەتىنە كۇن سايىن قيىر شىعىستان كەلىپ جاتقان مىڭداعان بوسقىنداردىڭ اراسىندا يسلامدىق راديكالداردىڭ بولۋى مۇمكىن دەگەن ءتۇرلى مالىمەتتەر كەلىپ جاتىر».
ونىڭ ايتۋىنشا، ازىرگە بۇل مالىمەتتەر راستالماعان. سەبەبى، كۇنى بۇگىنگە دەيىن گەرمانيادا تەررورلىق ارەكەتتەر ورىن الىپ جاتقان جوق. «دەگەنمەن، ماسەلەنىڭ باسقاشا كەيىپ الماۋىنا كىم كەپىل؟»، - دەگەن مينيستر، ەلدەگى جاعدايعا وبەكتيۆتى پىكىر ءبىلدىرىپ وتىر.
سونىمەن قاتار، مەزەر گەرمانياداعى بوسقىندارعا حالىقتىڭ تاراپىنان كورسەتىلىپ جاتقان زورلىق-زومبىلىققا قاتىستى الاڭداۋشىلىق بىلدىرەتىنىن جاسىرمادى: «بيىلعى جىلدىڭ وزىندە بوسقىن ستاتۋسىن سۇراپ كەلەتىندەردىڭ ۋاقىتشا پانالايتىن ورنىنا 490 شابۋىلدىڭ جاسالعانى جايلى مالىمەت بار. وتكەن جىلعى كورسەتكىش – 200-گە جۋىق بولاتىن».
ايتا كەتەيىك، حالىقارالىق ۇيىمداردىڭ مالىمەتتەرى بويىنشا، بيىل ەۋروپاعا كەلگەن بوسقىندار مەن ميگرانتتاردىڭ سانى جارتى ميلليوننان اسقان. بۇل 2014 جىلعا قاراعاندا ەكى ەسە ۇلكەن كورسەتكىش.
نازگۇل نازار
