سەيسەنبى كۇنى يوردان وزەنىنىڭ باتىستىق جاعالاۋىندا پالەستينالىقتار مەن يزرايلدىق قاۋىپسىزدىك كۇشتەرى اراسىنداعى ءىرى قاقتىعىستار بولىپ ءوتتى. بۇل تۋرالى «قامشى» پورتالى euronews.com-عا سىلتەمە جاساي وتىرىپ حابارلايدى. پالەستينالىق توپتار بۇل كۇندى «اشۋ-ىزا كۇنى» دەپ جاريالادى. مانيفەستانتتار كولىك دوڭگەلەكتەرىن ورتەپ، پوليسيا قىزمەتكەرلەرىنە تاس اتتى. بۇعان جاۋابى رەتىندە پوليسيا قىزمەتكەرلەرى كوزدى جاساۋراتاتىن قىشقىل گاز بەن رەزەڭكە وق پايدالاندى. زورلىق-زومبىلىقتىڭ بۇلاي كۇشەيۋىنە پالەستينالىق ۇكىمەت قايتادان يزرايلگە كىنا تاقتى.

«ءبىزدىڭ حالىققا قارسى اسكەري قىلمىستار مەن زورلىق-زومبىلىقتىڭ، حاوستىڭ، ەكسترەميزم مەن قان قانتوگىستىڭ قازىرگى تولقىنىنا يزرايلدىق ۇكىمەت تولىق جاۋاپكەرشىلىكتى ءوز موينىنا الۋى ءتيىس. بۇگىن، پالەستينا پرەزيدەنتى ماحمۋد ابباستىڭ وكىمىمەن، ءبىز ءيزرايلدىڭ پرەمەر-مينيسترىنە، سونىمەن قاتار قورعانىس مينيسترىنە جانە قاۋىپسىزدىك كۇشتەرىنىڭ باسشىلارىنا قارسى حالىقارالىق قىلمىستىق سوتقا ارىزدانۋ تۋرالى شەشىم قابىلدادىق»، - دەدى، «پالەستينانى ازات ەتۋ» ۇيىمىنىڭ اتقارۋ كوميتەتىنىڭ مۇشەسى سايد اريكات.

سوڭعى ەكى اپتا ىشىندە اتالمىش قاقتىعىستار بارىسىندا پالەستينالىق حالىقتىڭ 30-عا جۋىعى كوز جۇمىپ، جۇزدەگەن ادام اۋىر جاراقات العان. سەيسەنبى كۇنى يزرايلدىق جاۋىنگەرلەر جاندىرعىش زاتتى اسكەري كولىككە قاراي باعىتتاماق بولعان پالەستينالىقتى اتىپ ولتىرگەن بولاتىن.