«تاليبان» يسلاميستىك قوزعالىسى باس ماقساتتارىنا جەتكەندىكتەن اۋعانستاننىڭ سولتۇستىگىندەگى قۇندىز قالاسىنان كەتەتىنى تۋرالى مالىمدەدى. بۇل تۋرالى «قامشى» پورتالى bbc.com-عا سىلتەمە جاساي وتىرىپ حابارلايدى. «تاليبان» بۇلىكشىلەرى بۇل ايماقتا سوڭعى ەكى اپتا بويىندا ۇكىمەتتىك اسكەرمەن سوعىسقان بولاتىن.

تاليباندىق باسپا ءسوز حاتشىسىنىڭ حابارلاۋىنشا، بۇلىكشىلەر قۇندىز قالاسىندا ورنالاسقان تۇرمەدەن جۇزدەگەن جولداستارىن بوساتىپ، اسكەري تەحنيكانى باسىپ العان ەكەن.

بۇلىكشىلەر قۇندىز قالاسىنا قىركۇيەكتە كەلىپ، باس ايماقتاردان قۋىلعانشا، قالانى ءۇش كۇن بويىندا ۇستاپ وتىرعان. اۋعاندىق اسكەردىڭ بەرگەن مالىمەتى بويىنشا، قازىرگى ۋاقىتتا قالا تولىعىمەن ۇكىمەتتىڭ باقىلاۋىندا.

دەگەنمەن، قازىرگى ۋاقىتتا اۋعانستاننىڭ سولتۇستىگىندە ورنالاسقان گازني پروۆينسياسىنداعى كولىك جولىندا جاڭا شابۋىلدار ورشىگەن ەكەن. پروۆينسيا اتىمەن اتتاس قالادا تاليباندىقتارمەن شىعارىلعان زىمىران ەكى ادامدى ولتىرگەن كورىنەدى. جەرگىلىكتى حالىق بۇل ايماقتان جاپپاي كوشىپ جاتقانى تۋرالى حابارلامالار كەلىپ تۇسكەن.