رەسەيلىك اۆياسيا الەپپو قالاسىنداعى سيريالىق اسكەردىڭ ماسشتابتى قۇرلىقتىق وپەراسياسىن قولداۋعا دايىندالىپ جاتىر. بۇل تۋرالى «قامشى» پورتالى «Reuters» اقپاراتتىق اگەنتتىگىنە سىلتەمە جاساي وتىرىپ حابارلايدى. «حەزبوللاح» ليۆاندىق ۇيىمى وكىلدەرى مەن يراندىق اسكەردىڭ قاتىسۋىمەن وتەتىن اسكەري وپەراسيا جاقىن كۇندەرى باستالماق ەكەن. 

الەپپو قالاسىنىڭ باتىس جاعى سيريالىق اسكەردىڭ باقىلاۋىندا بولسا، قالعان بولىگى وپپوزيسيالىق توپتاردىڭ يەلىگىندە ەكەن. ال قالانىڭ سولتۇستىگىنە قاراي وپپوزيسيالىق توپتاردى «يسلامدىق مەملەكەت» ىعىستىرىپ وتىر.

سيريالىق ۇكىمەتكە جاقىن ورنالاسقان دەرەككوزدەردىڭ حابارلاۋىنشا، بۇل شابۋىل حاما پروۆينسياسىنداعى بۇلىكشىلەرگە قارسى وپەراسيانىڭ جالعاسى بولعالى تۇر ەكەن.

ولاردىڭ ايتۋىنشا، الەپپوداعى وپەراسيا تۋرالى شەشىم قابىلدانىپ قويعان جانە يراندىق اسكەري بولىمشەلەرگە ۇلكەن سەنىم ارتىلىپ وتىرعان كورىنەدى.

ايتا كەتەيىك، كۇنى كەشە رەسەيلىك اۋە بومبالاۋشىلار حاما پروۆينسياسىنا دا، الەپپو قالاسىنا شابۋىل جاساعان بولاتىن.