«شىعىس قازاقستان وبلىسىنىڭ ون تۇرعىنى كوشى-قون زاڭنامالارىن بۇزعانى ءۇشىن ەل اۋماعىنان شىعارىلىپ، تاعى 25 تۇرعىنعا ايىپپۇل سالىندى» دەپ حابارلايدى قامشى.kz شىعىس قازاقستان وبلىسى ءىىد كوشى-قون پوليسياسى باسقارماسى تاراتقان اقپاراتقا سۇيەنىپ.

زاڭ تالاپتارىن بۇزعان ول ازاماتتاردىڭ بارلىعى رەسەيدىڭ وتانداستاردى قونىستاندىرۋ مەملەكەتتىك باعدارلاماسى بويىنشا ءوتىنىش بەرگەندەر ەكەن. ولارعا رەسەي تاراپى قازاقستان رەسپۋبليكاسىنىڭ ازاماتتىعىن تاپسىرۋىن كۇتپەي، رەسەي فەدەراسياسىنىڭ ءتولقۇجاتتارىن تاپسىرا بەرگەن.

«بۇل ازاماتتاردىڭ بارلىعى رەسەي ازاماتتىعىن الۋ ءۇشىن ميگرانت مارتەبەسىمەن رەسەيگە بارعاندار. سول جەردە ولارعا ميگراسيالىق ورگاندار قازاقستان ازاماتتىعىنان شىققانىن راستاۋسىز-اق قۇجاتتار بەرگەن. وزدەرىندەگى قازاقستان رەسپۋبليكاسىنىڭ ءتولقۇجاتتارىن نە ىستەيمىز دەگەندەرگە «قازاقستانعا وتكىزىڭدەر» دەپ جاۋاپ بەرگەن. قازاقستاندىق ءتولقۇجاتتاردى تاپسىرۋعا كەلگەندە وسىلاي جاۋاپقا تارتىلىپ وتىر» دەلىنگەن كوشى-قون باسقارماسىنىڭ حابارلاماسىندا.

قوس ازاماتتىق يەلەرى قازاقستان زاڭدارى بويىنشا ەلدەن كۇشتەپ شىعارىلادى نەمەسە 200 اەك  كولەمىندە (396400 تەڭگە) ايىپپۇل تولەيدى.

 «قامشى» سىلتەيدى