بۇل تۋرالى 90-ماۋسىمنىڭ اشىلۋىنا وراي وتكەن باسپا ءسوز ءماسليحاتىندا قازاق مەملەكەتتىك م.اۋەزوۆ اتىنداعى اكادەميالىق دراما تەاترىنىڭ ديرەكتورى ق ر ەڭبەك سىڭىرگەن قايراتكەرى ەرلان ءبىلال مالىمدەدى. وندا جۇرتشىلىققا وتكەن ماۋسىمداعى تەاتر جۇمىسى مەن جاڭا جوسپارلار تانىستىرىلدى. بۇل تۋرالى «قامشى» پورتالى حابارلايدى.
- تەاتر جاڭا ماۋسىمعا زور جەتىستىكتەرمەن جەتىپ وتىر. بيىل ۇجىم رەسپۋبليكالىق اۋقىمداعى بىرنەشە مادەني ءىس-شارالارعا قاتىستى. 11- قىركۇيەك كۇنى ەلۋدەن اسا اكتەرىمىز ەلوردا تورىندە قازاق حاندىعىنىڭ 550 جىلدىعىنا وراي «ماڭگىلىك ەل» تەاترلاندىرىلعان قويىلىمىنا قاتىسسا، كۇنى كەشە تاراز قالاسىندا وتكەن مەرەيتويلىق سالتاناتتا ج. ەرعالييەۆتىڭ «قيلى زامان» شىعارماسى جەلىسىندەگى جاڭا قويىلىمدى جۇرتشىلىق نازارىنا ۇسىندى. شىعارماشىلىق ۇجىمنىڭ بۇل ەڭبەگى مەملەكەت باسشىلىعى، قالىڭ كورەرمەن تاراپىنان زور باعاعا يە بولدى، - دەدى جۋرناليستەرگە تەاتر باسشىسى، ق ر ەڭبەك سىڭىرگەن قايراتكەرى ەرلان ءبىلال.
تەاتردىڭ بيىلعى ماۋسىمى رەجيسسەر، ق ر حالىق ءارتىسى ە. وبايەۆ ساحنالاعان «اباي» تراگەدياسىمەن اشىلدى. قويىلىمداعى اباي ءرولىن ق ر ەڭبەك سىڭىرگەن قايراتكەرى ە. ءبىلال، ايگەرىم بەينەسىن ق ر ەڭبەك سىڭىرگەن قايراتكەرى د. ءجۇسىپ سومدادى.
باسپا ءسوز ءماسليحاتىندا، سونىمەن قاتار، جىل سوڭىنا دەيىن «قيلى زامان» قويىلىمىنىڭ ساحنالىق نۇسقاسى كورەرمەن نازارىنا ۇسىنىلاتىنى ايتىلدى. «قامشى» اقپاراتتىق پورتالى ءتىلشىسىنىڭ الاشوردا ۇكىمەتىنىڭ الدا كەلە جاتقان 100 جىلدىعىنا دايىندىق بارىسى، وسى داتاعا وراي تەاتردىڭ شىعارماشىلىق جوسپارى تۋرالى قويعان ساۋالىنا تەاتر باسشىسى، ە. ءبىلال:
- اكادەميالىق تەاتر ۇجىمى مەملەكەتتىك ماڭىزدى مۇنداي شارالاردان شەت قالعان ەمەس. تاريحي تاقىرىپتار ءبىزدىڭ تەاتر رەپەرتۋارىنىڭ باسىم بولىگىن قۇرايتىنىن بارلىقتارىڭىز بىلەسىزدەر. الاشوردا تاقىرىبىندا جازىپ جۇرگەن دراماتۋرگتارمەن جۇمىس ىستەۋ جوسپارىمىزدا بار. «الاش» پارتياسىنىڭ 100 جىلدىعى قارساڭىندا مەملەكەتتىك دەڭگەيدە قولداۋ جاسالىپ، قارجىلاندىرۋ ماسەلەسى ويداعىداي شەشىلىپ جاتسا، كورەرمەندەرگە ونداي قويىلىم ۇسىناتىن بولامىز، - دەپ جاۋاپ بەردى.
اكادەميالىق تەاتر ۇجىمى قازان، قاراشا ايلارىندا مينسك قالاسىندا وتەتىن بالتىق جاعالاۋى جانە تمد ەلدەرى جاس تەاتر قايراتكەرلەرىنىڭ ءىى حالىقارالىق فورۋمىنا، قىرعىز رەسپۋبليكاسىنىڭ «ارت وردو» حالىقارالىق فەستيۆالىنە، اتىراۋ قالاسىندا ۇيىمداستىرىلاتىن بەلگىلى دراماتۋرگ، جازۋشى راحىمجان وتاربايەۆتىڭ حالىقارالىق تەاتر فەستيۆالىنە قاتىساتىنىن ايتا كەتكەن ءجون.
«قامشى» سىلتەيدى
پىكىر قالدىرۋ