قازاننىڭ 14ء-ى مەن 16-ى ارالىعىندا ءىىم «اۆتوبۋس» رەسپۋبليكالىق الدىن الۋ شاراسىن وتكىزدى، - دەپ حابارلايدى «قامشى.kz» پورتالى.

ءۇش كۇنگە سوزىلعان شارا بارىسىندا پوليسەيلەر اۆتوبۋس جۇرگىزۋشىلەرى تاراپىنان جىبەرىلگەن 7،6 مىڭ جول ەرەجەسىن بۇزۋ فاكتىسىن انىقتاعان. تاراتىپ ايتار بولساق، 18 جۇرگىزۋشى كولىكتى ماس كۇيىندە جۇرگىزسە، 123 ەڭبەك جانە دەمالىس رەجيمىن بۇزۋ انىقتالعان. 245 شوپىر تىزگىنگە ءتيىستى كۋالىكتەرسىز وتىرسا، 332 جۇرگىزۋشىدە مىندەتتى ساقتاندىرۋ ءپوليۋسى بولماعان. 166 كولىك زاڭسىز قايتا جابدىقتالعان، 145 كولىك رەيس الدىنداعى تەحنيكالىق تەكسەرىستەن، 534 اۆتوبۋس جوسپارلى تەحنيكالىق تەكسەرىستەن وتپەگەن. ەرەجە بۇزۋشىلىقتاردىڭ 180ء-ى – جولاۋشىلار ءتىزىمىنىڭ بولماۋى، 455ء-ى جىلدامدىقتى شامادان تىس اسىرۋ، 1540-ى رولدە وتىرىپ تەلەفونمەن سويلەسۋ، 22 قارسى باعىتقا شىعۋ،  503 قورشاعان ورتانى لاستاۋ، 263 جاياۋ جۇرگىنشىلەرگە جول بەرمەۋ، 1131 مانيەۆر ەرەجەسىن بۇزۋ، 9 ليسەنزيالاۋ نورمالارىن ساقتاماۋ دەرەكتەرى بويىنشا تىركەلگەن.

ۇستىمىزدەگى جىلدىڭ 9 ايىندا رەسپۋبليكا جولدارىندا اۆتوبۋس جۇرگىزۋشىلەرىنىڭ قاتىسۋىمەن 455 جول-كولىك وقيعاسى تىركەلگەن. سونىمەن قاتار، پولسيەيلەر، جىل سايىن اۆتوبۋس جۇرگىزۋشىلەرىنىڭ كىناسىنەن 600-دەن اسا جول-كولىك وقيعاسىنىڭ بولاتىنىن، سونىڭ سالدارىنان وسى كۇنگە دەيىن 74 ادام قازا بولىپ، 900-دەن اسا ادام جاراقات العانىن حابارلادى.